2027 jyldan bastap dárigerlerdiń jalaqysy qalai ózgeredi?

2027 jyldan bastap dárigerlerdiń jalaqysy qalai ózgeredi?
Foto: JI

2027 jylǵy 1 qańtardan bastap Qazaqstandaǵy meditsinalyq-sanitariialyq alǵashqy kómek uiymdarynyń ýchaskelik qyzmet mamandaryna jańa qosymsha aqy tóleý josparlanyp otyr. Onyń mólsheri qyzmetkerdiń úzdiksiz eńbek ótiline bailanysty esepteledi, dep habarlaidy dalanews.kz.

Densaýlyq saqtaý ministrligi ázirlegen Úkimet qaýlysynyń jobasyna sáikes, alǵashqy meditsinalyq kómek uiymdarynda eki jyldan astam úzdiksiz jumys istegen mamandarǵa laýazymdyq ailyqaqynyń 20 paiyzy, úsh jyldan asqan jaǵdaida 30 paiyzy, al bes jyldan astam eńbek ótili bar qyzmetkerlerge 50 paiyzy kóleminde qosymsha aqy tóleý usynylǵan.

Bul ózgeris eldegi barlyq dárigerge birdei qatysty emes. Jańa tólem ýchaskelik terapevt, pediatr jáne jalpy praktika dárigerlerine, sondai-aq ýchaskelik, patronajdyq jáne mektep meiirgerlerine, feldsherler men akýsherlerge qarastyrylǵan. Jalpy alǵanda, shara 77 myńnan astam meditsina qyzmetkerin qamtymaq. 

Ministrliktiń aldyn ala esebinshe, aýyldyq jerlerde eńbek ótili joǵary jalpy praktika dárigeriniń jalaqysy qazirgi 534 myń teńgeden 760 myń teńgege deiin ósýi múmkin. Al orta meditsina qyzmetkeriniń ailyǵy 284 myń teńgeden 401 myń teńgege deiin kóterilýi múmkin.

Qalalarda tájiribesi mol jalpy praktika dárigeriniń jalaqysy 425 myń teńgeden 607 myń teńgege deiin, al orta meditsina qyzmetkeriniń tabysy 224 myń teńgeden 318 myń teńgege deiin artady dep boljanyp otyr.

Eńbek ótili az mamandardyń da ailyǵy kóteriledi. Aýyldyq jerlerde jalpy praktika dárigeriniń jalaqysy 386 myń teńgeden 450 myń teńgege deiin, orta meditsina qyzmetkeriniń ailyǵy 221 myń teńgeden 256 myń teńgege deiin ósýi múmkin. Qalalarda dárigerlerdiń jalaqysy 307 myń teńgeden 358 myń teńgege, al orta meditsina qyzmetkerleriniń tabysy 173 myń teńgeden 202 myń teńgege deiin ulǵaiýy yqtimal. 

Al alǵashqy meditsinalyq kómek uiymdarynda jumys isteitin psihologtarǵa bazalyq laýazymdyq ailyqaqynyń 300 paiyzy, áleýmettik qyzmetkerlerge 200 paiyzy mólsherinde psihoemotsiialyq jáne fizikalyq júkteme úshin qosymsha aqy belgileý usynylǵan.

Úkimet buǵan deiin ýchaskelik qyzmet mamandarynyń jalpy tabysy úzdiksiz eńbek ótiline qarai 40 paiyzǵa deiin ósetinin habarlaǵan. Al qaýly jobasynda qosymsha aqynyń eń joǵary mólsheri laýazymdyq ailyqaqynyń 50 paiyzy retinde kórsetilgen. Mundaǵy 50 paiyz qyzmetkerdiń tolyq jalaqysyna emes, tek laýazymdyq ailyqaqysyna esepteledi. Sondyqtan mamannyń qolyna alatyn jalpy tabysy shamamen 40 paiyzǵa deiin artýy múmkin. 

Aita keteiik, usynylǵan ózgerister ázirge túpkilikti bekitilgen joq. Qaýly jobasy "Ashyq NQA" portalynda jariia talqylaýdan ótip jatyr. Talqylaý 2026 jylǵy 7 jeltoqsanǵa deiin jalǵasady.