2026 jyly prezıdent Qasym-Jomart Toqaevtyń bastamalaryn júzege asyrýǵa 285 mlrd teńge baǵyttalmaq. Bul týraly ulttyq ekonomıka vıse-mınıstri Azamat Amrın májiliste ótken zań jobalaryn tanystyrý barysynda aıtty, dep habarlaıdy Dalanews.kz.
Búgin, 11 qyrkúıekte, májiliste 2026-2028 jyldarǵa arnalǵan respýblıkalyq búdjet týraly zań jobalary tanystyryldy. Onda prezıdenttiń bastamalaryna 285 mlrd teńge bólinetini belgili boldy.
"Bul kelesi jylǵa qarastyrylǵan qarajat. Oǵan bıylǵy Joldaýdy iske asyrý da, Joldaýdan tys tapsyrmalar, aımaqtarǵa saparlar kezindegi bastamalar da kiredi. Eger qosymsha tapsyrmalar bolsa, soǵan da rezerv bar. Rezerv shyǵyn kólemine baılanysty. Bıyl bizdiń kirister men shyǵystar osyndaı somany bólýge múmkindik berip otyr", – dedi Amrın májilis kýlýarynda.
Jańa Búdjet kodeksine sáıkes, prezıdent rezervi búdjet shyǵystarynyń keminde 1,5%-yn quraýy tıis. 2026 jyly respýblıkalyq búdjet kiristeri 19,2 trln teńge, shyǵystary – 27,7 trln teńge kóleminde josparlanǵan.
