2026 jylǵy 1 qańtardan bastap Qazaqstannyń sheteldegi diplomatiialyq ókildikteri shetel azamattaryna jeke sáikestendirý nómirin (JSN) berýdi toqtatady. Bul týraly Qazaqstannyń Reseidegi elshiligi málimdedi. Buǵan deiin JSN rásimdeýge múmkindik bergen pilottyq joba 2025 jylǵy 31 jeltoqsanǵa deiin ǵana jumys istegen, dep habarlaidy Dalanews.kz.
Endi shetel azamattaryna balama retinde eResidency baǵdarlamasy usynylady. Bul júie Qazaqstanǵa kelmei-aq, onlain formatta memlekettik qyzmetterdi paidalanýǵa múmkindik beredi. Baǵdarlama aiasynda JSN kórsetilgen tsifrlyq ID-karta rásimdelip, Qazaqstanda resmi tsifrlyq mártebe beriledi.
eResidency arqyly bank shotyn ashý, elektrondy tsifrlyq qoltańba alý, eSIM qosý, qarjy jáne kriptonaryqtarymen jumys isteý, saqtandyrý jáne salyq rezidenttigin rásimdeý múmkindigi qarastyrylǵan.
1 qańtardan keiin JSN qajet bolǵan jaǵdaida shetel azamattaryna eResidency baǵdarlamasynyń resmi saity arqyly ótinish berý usynylady.
