2026 jyldyń 1 qańtarynan bastap Mindetti áleýmettik meditsinalyq saqtandyrý paketi keńeitiledi. Osyǵan sáikes birqatar sozylmaly aýrýlardy emdeý tegin júrgiziledi, dep habarlaidy Dalanews.kz.
"2026 jyly 1 qańtardan bastap Mindetti áleýmettik meditsinalyq saqtandyrý (MÁMS) paketi keńeitiledi, jáne birqatar sozylmaly aýrýlar osy júie aiasynda kórsetiletin meditsinalyq qyzmetter tizimine engiziledi", - delingen habarlamada.
Atap aitqanda, MÁMS júiesine qant diabetin, balalardyń tserebraldy sal aýrýyn, revmatizmdi jáne dáneker tinderiniń júieli zaqymdanýlaryn emdeý engiziledi. Osylaisha, MÁMS sozylmaly aýrýlardyń basym bóligin qamtityn bolady.
Sonymen birge áleýmettik mańyzy bar 11 aýrý túri burynǵydai tegin meditsinalyq kómektiń kepildendirilgen kólemi aiasynda qarjylandyrylady. Olardyń qataryna týberkýlez, VICh-infektsiia, qaterli isikter, sozylmaly virýstyq gepatitter men baýyr tsirrozy, psihikalyq aýytqýlar, sirek (orfandyq) aýrýlar, ortalyq júike júiesiniń degenerativti jáne demielinizirleýshi aýrýlary, epilepsiia, jedel miokard infarkti (alǵashqy alty ai), sondai-aq insýlt (bir jyl ishinde) jatady.
Saqtandyrylǵan barlyq naýqasqa burynǵysynsha tegin em qabyldap, dáriger keńesine júginip, qajet dári-dármekterdi ala beredi. 12 millionnan astam azamat jeńildikti sanattarǵa jatady, olardyń jarnalary memleket esebinen tólenedi.
Budan bólek, 2026 jyldyń basynan bastap ómirlik qiyn jaǵdaiǵa tap bolǵan shamamen 1 million azamat jergilikti atqarýshy organdar esebinen meditsinalyq saqtandyrý júiesine engiziledi. Azamattarǵa "D" nemese "E" mártebesin naqtylaý úshin tirkelgen emhanasyna júginý usynylady.
Saqtandyrylǵan mártebe MÁMS aiasynda tegin taldaýlar, diagnostika, dárigerlerdiń konsýltatsiialary, josparly operatsiialar, emdeý jáne ońaltý qyzmetterine qol jetkizýge múmkindik beredi. Mártebeni FSMS servisteri, eGov portaly jáne mobildi qosymshalar arqyly tekserýge bolady.
