Ǵylym jáne joǵary bilim ministrligi 2026-2027 oqý jylyna arnalǵan joǵary oqý oryndaryna qabyldaý naýqanynyń negizgi merzimderin jariialady, dep habarlaidy dalanews.kz.
Vedomstvo málimetinshe, negizgi UBT 10 mamyr men 10 shilde aralyǵynda ótedi.
Joǵary oqý oryndaryna qujat qabyldaý 20 maýsymda bastalyp, 25 tamyzǵa deiin jalǵasady.
«Pedagogikalyq ǵylymdar» jáne «Densaýlyq saqtaý» baǵyttary boiynsha bilim berý baǵdarlamalaryna túsýshiler úshin arnaiy emtihandar 20 maýsym men 20 tamyz aralyǵynda ótkiziledi. Al grant konkýrsyna qatysý úshin talapkerler arnaiy emtihandy 20 shildege deiin tapsyrýy tiis.
Shyǵarmashylyq emtihandarǵa qatysýǵa ótinishter 20 maýsym men 10 tamyz aralyǵynda qabyldanady. Grant konkýrsyna qatysqysy keletin talapkerler úshin qujat qabyldaý 7 shildege deiin júrgiziledi.
Shyǵarmashylyq emtihandardyń ózi 7 shilde men 15 tamyz aralyǵynda ótedi. Grant konkýrsyna qatysýshylar bul emtihandardy 20 shildege deiin tapsyrýy qajet.
Bilim granttary konkýrsyna ótinishter 13-20 shilde aralyǵynda qabyldanady.
Memlekettik bilim granttarynyń iegerleri 10 tamyzǵa deiin belgili bolady.
Ministrlik talapkerlerge ózderin qyzyqtyratyn joǵary oqý oryndarynyń resmi saittary men áleýmettik jelidegi paraqshalarynan ózekti aqparatty qadaǵalap otyrýǵa keńes berdi.
