Kóptegen qazaqstandyq úshin alǵashqy páter nemese úi satyp alý – ómirdegi eń mańyzdy ári qýanyshty oqiǵalardyń biri. Bul armanǵa qol jetkizýge azamattarǵa Otbasy bank kómektesip keledi. Jyl basynan beri banktiń árbir úshinshi salymshysy alǵash ret óz baspanasyn alyp, jańa qonys iesi atanǵan, dep habarlaidy Dalanews.kz.
Qazaqstandyqtar tiimdi jinaq júrgizip, qoljetimdi nesie alýǵa turǵyn úi qurylys jinaqtary júiesi jáne onyń negizinde iske qosylǵan baǵdarlamalar arqasynda jetti. Bul baǵdarlamalar túrli áleýmettik toptarǵa baǵyttalǵan – jas mamandardan bastap, turǵyn úi kezeginde turǵan otbasylarǵa deiin. Olar jinaqtaý merzimin qysqartyp, tiimdi sharttarmen jyljymaityn múlik satyp alýǵa múmkindik beredi.
Biyldan beri alǵashqy baspanasyn satyp alǵan qazaqstandyqtar sany mynadai:
- Ǵalymdardan – 191 adam. Olarǵa nesie jyldyq 5% mólsherlememen berilip, bastapqy jarna 10% boldy.
- Memlekettik baǵdarlamalar arqyly turǵyn úi kezeginde turǵan 4 935 adam baspanaly boldy. Nesiemólsherlemesi 2% nemese 5%, bastapqy jarna 10% bolyp belgilengen.
- "Naýryz" jáne "Naýryz jýmysker" baǵdarlamalary boiynsha 7 038 qazaqstandyq úiliboldy. Áleýmettik osal sanattaǵy azamattarǵa nesiemólsherlemesi 7%, qalǵandaryna – 9%. Aita keterligi, bul baǵdarlama arqyly úi máselesin negizinen 35 jasqa deiingi jastar sheshe aldy – berilgen nesielerdiń shamamen 60%-y olarǵa tiesili.
- Oblystardaǵy 4 656 turǵyn óńirlik baǵdarlamalar aiasynda jańa baspanasyna ie boldy. Bul baǵdarlamalar ákimdiktermen birlese júzege asyrylady, sondyqtan sharttary ár óńirde ártúrli bolýy múmkin.
- Turǵyn úi qurylys jinaq júiesiniń qatysýshylary baǵdarlamalardan tys.
"Biyl Otbasy bankiniń qoldaýymen 60 myń qazaqstandyq otbasy óz baspanasyna ie boldy. Olar jalpy 1,250 trln teńge nesie aldy. Ótken jyldyń osy kezeńimen salystyrǵanda jańa turǵyn úige qonys aýdarǵandar sany 15%-ǵa, berilgen nesieler kólemi 37%-ǵa ósken. Bizdiń úshin erekshe mańyzdysy – biyl Otbasy banktiń árbir úshinshi klienti alǵash ret óz páteriniń esigin ashty. Bul degenimiz bank shynymen de adamdarǵa ómirindegi eń basty máselelerdiń biri – óz úiin satyp alý máselesin sheshýge kómektesip otyrǵanyn kórsetedi", – dedi Otbasy bank basqarma tóraiymy Lázzat Ibragimova.
Qazirgi tańda Otbasy bankinde 3 195 535 qazaqstandyq óz baspanasyna jinaq jasaýda. Kún saiyn shamamen 2 500 jańa depozit ashylyp, 200-dei nesie berilýde. Bank qoldaýymen biyldyń sońyna deiin taǵy 7 000–10 000 qazaqstandyq alǵashqy baspanasyn satyp ala alady dep kútilýde.
Túsinikteme: ártúrli baǵdarlamalar boiynsha jyldyq tiimdi syiaqy mólsherlemesi (JTSM) nesielin alýshy kategoriiasyna jáne kredittik sharttarǵa bailanysty 2%-dan 13%-ǵa deiin ózgeredi. Jas ǵalymdar baǵdarlamasy boiynsha JTSM – 5,2%–5,5%;Turǵyn úi kezeginde turǵandar úshin JTSM – 2,0%–2,1% jáne 5,2%–5,8%; «Naýryz» baǵdarlamasy boiynsha JTSM – 7,1%–9,6% jáne 9,4%–13%.
