Jambyl oblysynda memleketke qaitarylǵan aktivter esebinen áleýmettik mańyzy bar nysandardyń qurylysy jalǵasyp jatyr. Arnaiy memlekettik qordan óńirdiń densaýlyq saqtaý jáne aýyzsýmen qamtý júiesin damytýǵa 20 mlrd teńgeden astam qarajat bólingen, dep habarlaidy dalanews.kz.
"Memleketke qaitarylǵan aktivter esebinen qarjylandyrylyp jatqan áleýmettik nysandardyń qurylysy jalǵasýda. Búginde Qordai, Talas jáne Merki aýdandarynda eki jańa dárigerlik ambýlatoriia paidalanýǵa berilip, bir aýrýhana kúrdeli jóndeýden keiin qaita ashyldy", - dep jazdy jýrnalist Mihail Kozachkov.
Onyń málimetinshe, osy jobalardyń nátijesinde 85 myńnan astam turǵyn, onyń ishinde shalǵai aýyldarda turatyn shamamen 5 myń adam sapaly meditsinalyq kómekke qol jetkizgen.
Sonymen qatar oblysta 15 aýyzsý nysanynyń qurylysy aiaqtalyp, Taraz qalasy men Jambyl, Baizaq, Talas, Shý, Moiynqum, Qordai jáne Turar Rysqulov aýdandarynyń jalpy sany 28 myń turǵyny sapaly aýyzsýmen qamtamasyz etildi.
Qazirgi tańda óńirde aýyzsý júiesine qatysty taǵy segiz joba men densaýlyq saqtaý salasyndaǵy eki nysannyń qurylysy jalǵasyp jatyr. Sonyń biri – Qarasai batyr aýylyndaǵy jańa aýyzsý júiesi. Jobanyń jalpy quny shamamen 2,5 mlrd teńgeni quraidy, onyń 1,9 mlrd teńgesi Arnaiy memlekettik qordan bólingen.
"Barlyq nysannyń qurylysy men bólingen qarajattyń maqsatty jumsalýy oblys prokýratýrasynyń turaqty baqylaýynda", – delingen habarlamada.
