Májilis depýtaty Baqytjan Bazarbek daý týdyrǵan sózin túsindirdi, dep habarlaıdy Dalanews.kz.

Jýyrda ol "20 mıllıonǵa tatıtyn jumys istep júrmin" dep jurtty tańǵaldyrǵan edi. Halyq qalaýlysynyń aıtýynsha, ol sóziniń máni atqaryp júrgen jumysynyń aýqymyna qatysty bolǵan.

"Zań boıynsha talap etilgennen áldeqaıda kóp eńbek etemin. Jıyrma ese artyq desem de bolady, tipti otyz ese shyǵar. Joǵarǵy aýdıtorlyq palata, Jer resýrstary komıteti, Sý resýrstary jáne ırrıgasıa mınıstrligi, Ekologıa mınıstrligi men ekologıalyq ınspeksıa tarapynan tekseris júrgizýge bastamashy bolamyn. Iaǵnı memlekettik organdar ózderi atqarýǵa tıis sharýany keıde meniń áreketim arqyly oryndaýǵa májbúr bolady", – dedi ol.

Depýtat bul is-áreketter onyń tikeleı mindetine kirmeıtinin de aıtty. Alaıda ol memlekettik organdar óz qyzmetin tıisinshe atqarmaǵandyqtan, oǵan qosymsha jaýapkershilik alýǵa týra keletinin jetkizdi.

Aıta keteıik, 8 qyrkúıekte Baqytjan Bazarbek Májilis depýtaty retinde atqaryp júrgen jumysy shamamen 20 mıllıon teńgege tatıdy degen pikir bildirgen bolatyn.