«Akseleratsiianyń alǵy qadamdarynan ótken 39 jobanyń jiyrmasy tańdalyp alyndy. Endi olar akseleratsiianyń tolyq baǵdarlamasynan ótip, elimizdiń ár aimaǵynda júzege asýy úshin jumystar júrgiziledi. Búginde akseleratorlardyń aldynda úsh basty mindet tur. Iaǵni, daiyn degen jobalarǵa saraptyq jáne ádistemelik kómek kórsetý kerek, olarǵa investitsiialar tartý qajet jáne osy jobalardy jan-jaqty taratyp, aiasyn keńeitý kózdelip otyr, - dedi joba kýratory, «Rýhani jańǵyrý» qazaqstandyq qoǵamdyq damý institýty Saraptaý jáne ádistemelik qamtamasyz etý basqarmasynyń jetekshisi Liýdmila Býrlachenko.
Onyń aitýynsha «Ózgeristiń sárýarlary» jobasynyń qatysýshylary bilim, mádeniet, inkliýziia, ekologiia baǵyttary boiynsha tórt topqa bólingen.
«Biz tek óz kásipterinen tabys taýyp qana otyrǵandardy emes, áleýmettik mańyzy bar, qoǵamǵa tigizer paidasy mol jobalardy qoldaimyz. Ár joba «Rýhani jańǵyrý» baǵdarlamasynyń basty ustanymdaryna sáikes keledi. Naqty aitqanda, atalmysh jobalar barlyq qundylyqtardy saqtai otyryp, óz salasynda úzdik bolýy tiis, sondai-aq, innovatsiialyq túrde únemi úzdiksiz damýy qajet. Qazirdiń ózinde Qazaqstandy halyqaralyq naryqta alǵa jetelep, atyn qalyptastyrǵan brendter bar, – dep atap ótti Liýdmila Býrlachenko.
Máselen, sondai jobalardyń biri – «Aspara Fashion week». Mádeniet salasynda júzege asyp jatqan bul joba fashion-indýstriia tarihynda birinshi ret halyqaralyq deńgeide onlain sán aptalyǵyn ótkizip jatyr.
Bilim berý salasynda «Open English» jobasy da erekshe nazar aýdartady. Bul áleýmettik jobada erikti jastar joǵary synyp oqýshylaryna aǵylshyn tilin úiretedi. Sonymen qatar, atalmysh joba erikti jastarǵa basqarý tehnologiiasynyń zamanaýi úlgilerine beiimdep, kóshbasshylyq qasietterin arttyrady jáne aldaǵy ýaqytta jumysqa ornalasý máselesin de jeńildetedi.
Jiyrma jobanyń segizi inkliýzivti salaǵa arnalady. Olardy osy baǵyttaǵy tájiribesi mol «Bolashaq», «Salamatty bolashaq», «Zamandas» qorlary jáne endi ǵana qurylǵanymen áleýmettik salaǵa innovatsiialyq kózqarasymen engen «Altyn bala» kásipkerleri júzege asyrmaq. Bulardan bólek, inkliýzivti baǵyt boiynsha «Kunde» jáne «Emoji» áleýmettik kafeleri jumys jasap jatyr.
Akseleratorlar qataryna qosylǵan jobalardyń ishinde burynnan júieli jumys jasap kele jatqan jelilik uiymdar da bar. Máselen, solardyń biri retinde Qazaqstannyń ár aimaǵynda jumys jasaityn «Azamattyq bastamalar ortalyǵynyń» jelisin jáne ata-analar men mektep arasyndaǵy bailanysty nyǵaitýǵa arnalǵan «QOLDAU» bilim berý uiymdarynyń qamqorlyq keńesi» qoǵamdyq birlestigin aitýǵa bolady.
«Akseleratorlar jumysynyń basty ereksheligi retinde ár jobaǵa jeke toqtalyp, tyńǵylyqty kóńil buratyndyǵyn aitýǵa bolady. Sarapshylardyń 3 ai ishinde atqarǵan jumystarynyń arqasynda atalǵan jobalar jan-jaqty damýy úshin zor qoldaýǵa qol jetkizdi», – dep Liýdmila Býrlachenko óz oiyn qorytyndylady.
Endi kýratordyń aitýynsha, tańdalyp alynǵan 20 joba tek jergilikti deńgeide qalyp qoimai, masshtabyn keńeitip, «Rýhani jańǵyrýdyń» aimaqtyq jobalar ortalyǵymen bailanysa otyra barlyq aimaqta jan-jaqty damityn bolady.
