Soltústik Qazaqstan oblysynda politseiler Petropavlǵa sintetikalyq esirtki jetkizý arnasynyń jolyn kesti, dep habarlaidy dalanews.kz.
7 mamyr kúni Petropavl qalasyndaǵy Parkovaia kóshesinde Astana qalasynyń 19 jastaǵy turǵyny ustaldy. Ol sintetikalyq esirtki zattaryn taratty degen kúdikke ilindi.
Tekserý barysynda kúdiktiden sarǵysh tústi untaq salynǵan 88 orama tárkilengen. Saraptama nátijesine sáikes, tárkilengen zattyń jalpy salmaǵy 90 gramm bolatyn mefedron psihotroptyq zaty ekeni anyqtaldy.
Politseilerdiń málimetinshe, mundai kólemdegi esirtki shamamen 300 adamdy táýeldi etýi múmkin.
Kúdikti tergeý kezinde zańsyz áreketpen osy jyldyń naýryz aiynan beri ainalysyp kelgenin aitqan. Qazirgi ýaqytta atalǵan fakti boiynsha sotqa deiingi tergeý amaldary júrgizilip jatyr.
Zań boiynsha esirtki zattaryn asa iri mólsherde ótkizgeni úshin 7 jyldan 12 jylǵa deiin bas bostandyǵynan aiyrý jazasy qarastyrylǵan.
Oblystyq politsiia departamentiniń deregine sáikes, jyl basynan beri Soltústik Qazaqstan oblysynda esirtkige qatysty 112 quqyq buzýshylyq tirkelgen. Onyń 58-i — esirtki ótkizý faktileri.
