Senat tóraǵasy Máýlen Áshimbaev jańa Konstıtýsıa referendýmda qoldaý tapsa, 15 naýryz Konstıtýsıa kúni bolyp bekitilýi múmkin ekenin málimdedi, dep habarlaıdy Dalanews.kz.
Onyń aıtýynsha, ótpeli erejelerge sáıkes, Konstıtýsıa kúni retinde qujattyń kúshine engen ýaqyty emes, qabyldanǵan kúni belgilenedi. Al jańa Konstıtýsıa 15 naýryzda qabyldanýy yqtımal. Sondyqtan halyq referendýmda qoldaý bildirse, Qazaqstanda Konstıtýsıa kúni 15 naýryz bolyp ózgerýi múmkin.
Sondaı-aq Máýlen Áshimbaev jańa Konstıtýsıa qabyldanǵan jaǵdaıda Senat óz ókilettigin 1 shildede aıaqtaıtynyn aıtty. Onyń sózinshe, ótpeli normalarǵa sáıkes Senat pen Májilis taratylǵannan keıin eki aı ishinde jańa saılaý ótýi tıis.
Osylaısha, jańa parlament – Quryltaı 1 qyrkúıekten bastap jumysyn bastaýdy josparlap otyr. Eger halyq jańa Konstıtýsıany qoldasa, qazirgi parlament 1 shildege deıin jumysyn jalǵastyryp, odan keıin jańa quram jasaqtalady.
