Qazaqstanda oqýshylardyń jazǵy demalys kezinde qaýipsiz ári resmi jumys tabýyna múmkindik jasaldy, dep habarlaidy dalanews.kz.
Bul týraly Úkimet otyrysynda Eńbek jáne halyqty áleýmettik qorǵaý ministri Asqarbek Ertaev málimdedi.
Ministrdiń aitýynsha, byltyrdan bastap elektrondyq eńbek birjasy enbek.kz platformasynda «Meniń jazǵy demalysym» arnaiy bólimi iske qosylǵan.
Joba aiasynda 14 jastan bastap oqýshylar platformaǵa tirkelip, jeke kabinet ashyp, túiindeme ornalastyra alady jáne óz betinshe jumys izdeidi. Al 16 jasqa deiingi oqýshylardyń akkaýntyn zańdy ókilderi rásimdeidi.
«Bul oqýshylarǵa platformada tirkelip, túiindeme jariialap, ózine qolaily jumysty izdeýge múmkindik beredi. Sonymen birge barlyq eńbek qatynastary resmi rásimdeledi», – dedi Asqarbek Ertaev.
Ministrliktiń málimetinshe, platforma arqyly jumysqa ornalasý kezinde eńbek sharty mindetti túrde jasalady, bul oqýshylardyń quqyqtaryn qorǵaýǵa jáne qaýipsiz eńbek jaǵdaiyn qamtamasyz etýge baǵyttalǵan.
Biylǵy jyldyń basynan beri «Meniń jazǵy demalysym» bólimi arqyly 1 024 oqýshy jumysqa ornalasqan.
Al 2025 jyly bul kórsetkish 4 552 oqýshyny quraǵan.
Jalpy, ótken jyldan beri jumyspen qamtýdyń belsendi sharalarymen 8,5 myńnan astam jas qamtylǵan.
Olardyń basym bóligi qoǵamdyq jumystarǵa tartylǵan. Ministrlik muny mundai jumystarǵa ornalasý kezinde arnaiy bilimniń talap etilmeýimen túsindirdi.
Biyl oqýshylardy jumyspen qamtý sharalary oqý jyly aiaqtalǵannan keiin bastalady.
