100 jylqynyń joǵalýyna bailanysty is boiynsha aqtalyp shyqqan jylqyshy Rahat Sársenbaidyń burynǵy jumys berýshisi Tájiǵali Eleýov alǵash ret pikir bildirdi. Kásipker áleýmettik jelide jariialaǵan videosynda oqiǵaǵa qatysty óz ýájin aitty, dep habarlaidy dalanews.kz.
69 jastaǵy kásipkerdiń aitýynsha, Rahat Sársenbai uzaq jyldar boiy onyń sharýashylyǵynda jumys istegen. Ol qyzmet barysynda keibir kemshilikterge kóz jumyp kelgenin, alaida keiin jylqylardyń jappai joǵalýyna bailanysty másele kúrdelene túskenin jetkizdi.
"Men mal sharýashylyǵyn bastaǵan kezde Rahatty jumysqa qabyldadym. Uzaq jyl birge eńbek ettik. Buǵan deiin birneshe jylqy joǵalǵan jaǵdailar boldy, biraq oǵan bola másele kótergen joqpyn. Keiin kóp kólemde mal joǵalǵan kezde oqiǵaǵa basqa adamdardyń da qatysy anyqtaldy. Solardyń biri malymdy satyp jatqan jerinde ustalyp, qazir jazasyn ótep jatyr. Men ózime senip tapsyrylǵan mal úshin jaýapty adamnan esep suraýdy zańdy dep sanaimyn", - dedi kásipker.
Sondai-aq ol áleýmettik jelide taraǵan aqparattardyń birjaqty berilip jatqanyn aityp, Rahat Sársenbaidyń tolyq aqtalǵany jónindegi pikirlermen kelispeitinin jetkizdi.
"Qazir keibir adamdar ony tolyq aqtaldy dep kórsetip, halyqtyń aldynda jábirlenýshi beinesin qalyptastyryp jatyr. Menińshe, bul istiń barlyq mán-jaiy aitylyp jatqan joq. Osy sebepti óz pikirimdi bildirýdi jón kórdim", - dedi ol.
Tájiǵali Eleýov ózine qatysty jaǵymsyz pikirlerdiń kóbeigenine toqtalyp, áleýmettik jelidegi aqparatqa syn kózben qaraýǵa shaqyrdy. Onyń sózinshe, bul máselege bailanysty zańgerleri quqyqtyq turǵyda jumys júrgizip jatyr.
"Men ómir boiy eńbekpen kún kórgen adammyn. Blogerlermen jarysyp pikir talastyra almaimyn. Biraq áleýmettik jelidegi jazbalar arqyly meniń abyroiyma nuqsan keltirilip jatyr dep esepteimin. Sondyqtan bul máselemen endi zańgerler ainalysady", - dedi kásipker.
Buǵan qosa, ol burynǵy qyzmetkerine jáne onyń otbasyna talai ret qoldaý kórsetkenin aityp, ózine taǵylyp jatqan aiyptaýlarmen kelispeitinin jetkizdi.
Eske salaiyq, buǵan deiin 100 jylqynyń joǵalýyna bailanysty sottalǵan Rahat Sársenbaidyń isi qaita qaralyp, apelliatsiialyq saty ony aqtap shyqqan. Osydan keiin atalǵan is qoǵamda keńinen talqylana bastady.
