Aqtóbe oblysynda "100 bas jylqy urlady" degen aiyppen 7 jylǵa sottalǵan 60 jastaǵy Rahat Sársenov apelliatsiialyq sottyń sheshimimen bostandyqqa shyqty, dep habarlaidy dalanews.kz.
Biyl mamyrda Muǵaljar aýdandyq soty ony 7 jylǵa bas bostandyǵynan aiyryp, jábirlenýshi taraptyń 30 million teńge kólemindegi azamattyq talabyn da qanaǵattandyrǵan bolatyn. Alaida qorǵaýshylar bul úkimge kelispei, apelliatsiialyq shaǵym túsirgen.
Isti qaita qaraý barysynda aiyptaý baby ózgertildi. Sot Rahat Sársenov 100 emes, bir ǵana jylqynyń quny kóleminde materialdyq shyǵyn keltirgenin anyqtaǵan.
Insýlt alǵan qariiaǵa raqymshylyq týraly zań qoldanylyp, ol sot zalynan bosatyldy.
Jýrnalist Rýslan Ótepbai jylqyshy Rahat Sársenovtiń isine bailanysty Aqtóbe oblysyna barǵan. Onyń aitýynsha, qariianyń densaýlyǵy nasharlaǵan. Ol 2025 jyly insýlt alǵan.
"Osy densaýlyǵymen 2 ai 2 kún tergeý izoliatorynda otyrdy. "Eń aýyry 60 jasymdy túrmede qarsy aldym" deidi", - dep jazdy jýrnalist.
Sondai-aq, Rýslan Ótepbai bul iske qatysty taǵy bir jaitty jariialady. Onyń aitýynsha, Rahat Sársenovti 2019 jyly burynǵy jumys berýshisi notariýsqa aparyp, jalǵyz baspanasyn kepilge qoiǵyzǵan. Erli-zaiypty qujat orys tilinde rásimdelgenin, sondyqtan naqty qandai qujatqa qol qoiǵanyn tolyq túsinbegenin aitqan.
Qazir Rahat Sársenov jalǵyz baspanasynan aiyrylyp qalýy múmkin. Jýrnalistiń málimetinshe, bul máselege qatysty sot sheshimi de shyǵyp qoiǵan.
"Zańger Baǵdat Amandosuly notariattyq qujattyń zańdylyǵyna kúmán keltirip, ony jaramsyz dep taný úshin quzyrly organdarǵa tiisti aryzdardy daiyndap jatqanyn málimdedi. Istiń naqty quqyqtyq baǵasyn sot pen ýákiletti organdar beredi", - dedi ol.
