Sátbaev qalalyq soty qalanyń eks-ákimi Shapaǵat Áýbákir jáne jeke kásipker qatysty qylmystyq isti qaraýdy aiaqtady, - dep habarlaidy Dalanews.kz.
Tergeý organy Shapaǵat Áýbákirdi asa iri mólsherde para aldy (QK 366-babynyń 2-bóligi), M. – qomaqty mólsherde para berdi (QK 367-babynyń 2-bóligi) dep aiyptady.
"2024 jyldyń aqpan aiynda Á. qala ákimi bola tura, Sátbaev qalasyndaǵy joldardy kútip ustaý jumystaryn júrgizetin jeke kásipker M.-nan memlekettik satyp alý shartynyń somasyn ulǵaitýǵa jáne onyń keńeiýine járdemdesý úshin 10 mln.teńge kóleminde para alǵan. Sottalýshylardyń kinási moiyndaýlarymen jáne sotqa usynylǵan dáleldemelerdiń jiyntyǵymen dáleldendi", - dep habarlady Sátbaev soty.
Prokýror sottan sottalýshylardy joǵaryda atalǵan qylmystardy jasaǵany úshin kináli dep tanyp, memlekettik qyzmette laýazymdardy atqarý quqyǵynan ómir boiyna aiyra otyryp, 3 jyl 6 aiǵa bas bostandyǵynan aiyrýdy surady.
Sottalýshylar óz kinálaryn tolyq moiyndap, sottan olarǵa bas bostandyǵynan aiyrýdan basqa jaza taǵaiyndaýdy surady.
Jaza taǵaiyndaý kezinde sot sottalýshylardyń kinásin moiyndaýyn, shyn júrekten ókinýin jáne jas balalardyń bolýyn qylmystyq jaýaptylyq pen jazany jeńildetetin mán-jailar dep tanydy.
Eks-ákimniń qabyldaǵan antyn buzýy onyń jaýapkershiligi men jazasyn aýyrlatatyn mán-jai dep tanyldy.
Sot úkimimen Shapaǵat Áýbákir QK-niń 366-babynyń 2-bóligimen kináli dep tanylyp, oǵan memlekettik qyzmette laýazymdardy atqarý quqyǵynan ómir boiyna aiyra otyryp, 3 jyl 6 aiǵa bas bostandyǵynan aiyrý jazasy taǵaiyndaldy.
"M. QR QK-niń 367 babynyń 2 bóligimen kináli dep tanylyp, oǵan memlekettik qyzmette laýazymdardy atqarý quqyǵynan ómir boiyna aiyra otyryp, paranyń jiyrma eselengen somasy – 200 mln. teńge aiyppul taǵaiyndaldy. Sátbaev qalasy ákimdigine qatysty bólinetin biýdjet qarjysynyń negizdiligin, qarjylandyrý josparynyń jáne maqsatty paidalanýyn qaita qarap, únemdi paidalanýynyń tiisti sharalaryn júrgizý úshin jeke qaýly shyǵaryldy. Úkim zańdy kúshine engen joq", - delingen habarlamada.
