ساتبايەۆ قالالىق سوتى قالانىڭ ەكس-اكىمى شاپاعات اۋباكىر جانە جەكە كاسىپكەر قاتىستى قىلمىستىق ءىستى قاراۋدى اياقتادى، - دەپ حابارلايدى Dalanews.kz.
تەرگەۋ ورگانى شاپاعات اۋباكىردى اسا ءىرى مولشەردە پارا الدى (قك 366-بابىنىڭ 2-بولىگى)، م. – قوماقتى مولشەردە پارا بەردى (قك 367-بابىنىڭ 2-بولىگى) دەپ ايىپتادى.
"2024 جىلدىڭ اقپان ايىندا ءا. قالا اكىمى بولا تۇرا، ساتبايەۆ قالاسىنداعى جولداردى كۇتىپ ۇستاۋ جۇمىستارىن جۇرگىزەتىن جەكە كاسىپكەر م.-نان مەملەكەتتىك ساتىپ الۋ شارتىنىڭ سوماسىن ۇلعايتۋعا جانە ونىڭ كەڭەيۋىنە جاردەمدەسۋ ءۇشىن 10 ملن.تەڭگە كولەمىندە پارا العان. سوتتالۋشىلاردىڭ كىناسى مويىنداۋلارىمەن جانە سوتقا ۇسىنىلعان دالەلدەمەلەردىڭ جيىنتىعىمەن دالەلدەندى"، - دەپ حابارلادى ساتبايەۆ سوتى.
پروكۋرور سوتتان سوتتالۋشىلاردى جوعارىدا اتالعان قىلمىستاردى جاساعانى ءۇشىن كىنالى دەپ تانىپ، مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرا وتىرىپ، 3 جىل 6 ايعا باس بوستاندىعىنان ايىرۋدى سۇرادى.
سوتتالۋشىلار ءوز كىنالارىن تولىق مويىنداپ، سوتتان ولارعا باس بوستاندىعىنان ايىرۋدان باسقا جازا تاعايىنداۋدى سۇرادى.
جازا تاعايىنداۋ كەزىندە سوت سوتتالۋشىلاردىڭ كىناسىن مويىنداۋىن، شىن جۇرەكتەن وكىنۋىن جانە جاس بالالاردىڭ بولۋىن قىلمىستىق جاۋاپتىلىق پەن جازانى جەڭىلدەتەتىن ءمان-جايلار دەپ تانىدى.
ەكس-اكىمنىڭ قابىلداعان انتىن بۇزۋى ونىڭ جاۋاپكەرشىلىگى مەن جازاسىن اۋىرلاتاتىن ءمان-جاي دەپ تانىلدى.
سوت ۇكىمىمەن شاپاعات اۋباكىر قك-نىڭ 366-بابىنىڭ 2-بولىگىمەن كىنالى دەپ تانىلىپ، وعان مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرا وتىرىپ، 3 جىل 6 ايعا باس بوستاندىعىنان ايىرۋ جازاسى تاعايىندالدى.
"م. ق ر قك-نىڭ 367 بابىنىڭ 2 بولىگىمەن كىنالى دەپ تانىلىپ، وعان مەملەكەتتىك قىزمەتتە لاۋازىمداردى اتقارۋ قۇقىعىنان ءومىر بويىنا ايىرا وتىرىپ، پارانىڭ جيىرما ەسەلەنگەن سوماسى – 200 ملن. تەڭگە ايىپپۇل تاعايىندالدى. ساتبايەۆ قالاسى اكىمدىگىنە قاتىستى بولىنەتىن بيۋدجەت قارجىسىنىڭ نەگىزدىلىگىن، قارجىلاندىرۋ جوسپارىنىڭ جانە ماقساتتى پايدالانۋىن قايتا قاراپ، ۇنەمدى پايدالانۋىنىڭ ءتيىستى شارالارىن جۇرگىزۋ ءۇشىن جەكە قاۋلى شىعارىلدى. ۇكىم زاڭدى كۇشىنە ەنگەن جوق"، - دەلىنگەن حابارلامادا.
