Qazaqstanda jańa oqý jyly bastalǵaly beri 104 oqýshyǵa koronavirýs juqqan: 33 bala kezekshi synypta oqyǵan, 71 bala úiden oqyp kelgen. Olarmen bailanysta bolǵan adamdar anyqtaldy. 30 qyrkúiekte úkimet otyrysy kezinde densaýlyq saqtaý ministri Aleksei Tsoi osylai dep málimdedi.
Qazaqstanda koronavirýsqa bailanysty oqýshylardyń basym bóligi 1 qyrkúiekten bastap qashyqtan oqi bastaǵan. Resmi málimet boiynsha tek bastaýysh synyp oqýshylary úshin ǵana kezekshi synyptar uiymdastyrylǵan. Qazir jarty millionnan astam oqýshy (625 myń bala) - oflain, 2,85 mln oqýshy onlain oqyp jatyr.
Densaýlyq saqtaý ministrliginiń málimetinshe, Shyǵys Qazaqstan (13) jáne Soltústik Qazaqstan (10) oblystarynda koronavirýs juqqan oqýshylar kóbirek anyqtalǵan.
Sanitarlyq talaptarǵa sáikes, kezekshi synyptarda oqýshylar sany 15-ten aspaýy tiis. Synyptarǵa úzilis ár ýaqytta jariialanyp, oqýshylardyń sabaq kezinde jaqyn otyrýyna tyiym salynǵan.
Sońǵy málimet boiynsha, Qazaqstanda koronavirýs pen koronavirýs pnevmoniiasyna shaldyqqandar sany 140 myńnan asqan. Naýryz aiynan beri 2 myńnan astam adam qaitys bolǵan. Qazir ondaǵan bala koronavirýstan emdelip jatyr. Densaýlyq saqtaý ministrliginiń habarlaýynsha, elde koronavirýspen bailanysty bala ólimi tirkelmegen.
