Aýyr ekonomikalyq qylmys jasady degen kúdikke ilingen Qazaqstan azamaty Grýziiadan elge qaitaryldy. Bul týraly Bas prokýratýra men Qarjy monitoringi agenttigi málimdedi, dep habarlaidy Dalanews.kz.
Vedomstvolardyń habarlaýynsha, kúdiktini Qazaqstanǵa ekstraditsiialaý milliardtaǵan salyq tólemeýge qatysty qylmystyq is aiasynda júzege asqan. Tergeý derekterine sáikes, ol 2023–2024 jyldary Almaty qalasynda ornalasqan kommertsiialyq uiymdy basqarǵan. Osy kezeńde sybailastarymen birge naqty jumys atqarmai, jalǵan shot-faktýralar rásimdegen.
Zańsyz áreketter saldarynan memleketke shamamen 1,3 milliard teńge kóleminde salyqtyq shyǵyn keltirilgeni anyqtaldy.
Quqyq qorǵaý organdarynyń málimetinshe, qylmys jasalǵannan keiin kúdikti boi tasalap, halyqaralyq izdeýge jariialanǵan. Ol 2025 jyldyń qyrkúieginde Grýziia aýmaǵynda ustalyp, Bas prokýratýranyń suraýy boiynsha Qazaqstanǵa ekstraditsiialandy.
Qazirgi ýaqytta er adam tergeý izoliatoryna qamaldy. Al osy qylmystyq is boiynsha onyń sybailastarynyń biri sáýir aiynda sot úkimimen bas bostandyǵynan aiyrylǵan.
