Қазақстанда жанар-жағармай тапшылығының алдын алу мақсатында Павлодар мұнай-химия зауытындағы жоспарлы жөндеу жұмыстары бір жылға шегерілді, деп хабарлайды dalanews.kz.
Бұл туралы «ҚазМұнайГаз» компаниясы хабарлады. Компания мәліметінше, шешім ішкі нарықты мұнай өнімдерімен тұрақты қамтамасыз ету үшін қабылданған.
Қазіргі уақытта елде жанар-жағармайға сұраныс жоғары болып отыр. Сондықтан ірі мұнай өңдеу зауытының жұмысын уақытша тоқтату кейбір өңірлерде бензин мен дизель отынының тапшылығына әкелуі мүмкін. «ҚазМұнайГаз» өкілдері бұл шешім жанар-жағармай тапшылығы туындағанын білдірмейтінін атап өтті. Бұл – сұраныс жоғары кезеңде жеткізілімнің тұрақтылығын сақтау үшін қабылданған алдын алу шарасы.
Айта кетейік, Павлодар мұнай-химия зауытындағы соңғы жоспарлы-алдын алу жөндеу жұмыстары 2025 жылдың шілде айында аяқталған болатын.
Компания Қазақстандағы мұнай өңдеу зауыттарының жөндеуаралық кезеңін ұлғайту бағытында жұмыс жүргізіп жатқанын мәлімдеді. Мәселен, Шымкент мұнай өңдеу зауыты үш жылдық жөндеу цикліне көшкен. Мұндай тәжірибе Павлодар және Атырау мұнай өңдеу зауыттарында да кезең-кезеңімен енгізіліп жатыр. Компания өкілдерінің айтуынша, өндірістік жабдықтардың сенімділігі басты назарда қала береді.
Сонымен қатар елде мұнай өңдеу көлемін ұлғайту жоспары жүзеге асырылуда. Жоспарға сәйкес, Павлодар мұнай-химия зауытының жылдық өңдеу қуаты қазіргі 6 млн тоннадан 9 млн тоннаға дейін арттырылады. Бұл ішкі нарықты мұнай өнімдерімен қамтамасыз ету мүмкіндігін күшейтуге бағытталған.
