Мәжіліс депутаты Ермұрат Бапи белсенді түрде активтерін қайтарып жатқан Қайрат Сатыбалдыұлы бостандыққа шығуы мүмкін деп қауіптеніп отыр, - деп хабарлайды Dalanews.kz.
Бұл туралы депутат Facebook парақшасында жазды.
"Оны (Сатыбалдыұлын) мерзімінен бұрын шартты түрде босатуға немесе амнистия жасауға дайындап жатыр ма? Ұрлаған активтерін өз еркімен қайтарып жатқаны жақсы. Бірақ ол мемлекет қазынасына түсе ме? Ресми деректерге сену не сенбеу ғана қалды. Себебі қайтарылған активтерді бақылап отыратын 100 пайыз мемлекеттік компанияда қоғамдық бақылау жоқ", - дейді Ермұрат Бапи.
Еске салайық, бұған дейін Қайрат Сатыбалдыдан қайтарылған дүние-мүліктің тізімі жарияланған болатын.
Сыбайлас жемқорлыққа қарсы қызмет Қайрат Сатыбалдыұлына қатысты “Қазақтелеком” АҚ, “Көлік сервис орталығы” АҚ қаражатын аса ірі мөлшерде жымқыру, қылмыстық жолмен алынған ақшаны және өзге де мүлікті заңдастыру, сондай-ақ кедендік баждарды төлеуден жалтару фактілері бойынша қылмыстық істерді тергеді. Антикор оның нәтижелерін жариялады.
Айта кетерлігі, қайтарылған активтердің жалпы сомасы 732,8 млрд теңгені құрайды, олар:
- «Қазақтелеком» АҚ акцияларының 28,8% - 93,8 млрд тг.
- «КСО» АҚ – 30,2 млрд тг.
- 4 компаниядағы қатысу үлесі – 10,3 млрд тг.
- Қазақстандағы мүліктік активтер – 158,5 млрд тг.
- Эксклюзивті зергерлік бұйымдар – 105,39 млрд тг. (230 млн.$)
- Қазақстандық шоттардағы ақша – 36,8 млрд тг.
- Австриядан келген ақша – 36,8 млрд тг. (82,1 млн.$)
- Лихтенштейннен түскен ақша – 116,7 млрд тг. (260,5 млн.$)
- БАӘ-нен келген ақша – 6,3 млрд тг. (14 млн.$);
- Түркиядан келген ақша – 2,2 млрд тг. (4,92 млн.$);
- Бағалы қағаздарды сату – 135,8 млрд тг. (300 млн доллар).
"Мәселен, құны 158 млрд теңгеден асатын 115 қазақстандық объект мемлекеттік меншікке берілді, оның ішінде 73 жылжымайтын мүлік объектісі (13 үй, 10 ғимарат, 13 жер учаскесі, 4 пәтер, 3 ғимарат, қосымша салынған 2 медресе ғимараты, 2 тұрақ орны, 25 үй-жай, 1 аяқталмаған құрылыс объектісі), 37 жылжымалы мүлік объектісі (29 автомашина, 5 арнайы техника, 3 квадроцикл) және өзге де мүлік бар. Мүліктің бір бөлігі оның жақын туыстарына, аффилиирленген тұлғаларына және бақылаудағы компанияларға рәсімделген", - делінген Антикор хабарламасында.
Астана және Алматы қалаларында мемлекетке берілген әкімшілік ғимараттардың жалпы ауданы 180 мың шаршы метрден асады. Бұрын бұл активтер жалға беріліп, жыл сайын меншік иесіне миллиардтаған табыс әкелген, мүлік қазір мемлекетке қайтарылды.
Люкс нысанның бірі – Ақмола облысының Барап ауылында жалпы ауданы 1,5 мың шаршы метр, жер учаскесі 135 гектар бұрынғы Қ. Сатыбалдыұлы резиденциясы – Астана қаласының Білім басқармасына берілді.
Бұл қаражаттар мемлекетке қайтарылып, әлеуметтік мақсаттарда пайдалануға бағытталды.
