– Ауыл-аймақ тұрғындарының өмір сүруіне қолайлы жағдай жасап, инфрақұрылымды жақсарту бағытында бірқатар жобалар қолға алынды. Жол жөндеу, ауыз су және табиғи газбен қамту жұмыстары кезең-кезеңімен атқарылуда.
Міне, бүгін тағы бір ауыл «көгілдір отынға» қол жеткізіп отыр. Құтты болсын! Ендігі кезекте тұрғындарды кәсіпкерлікке тартуға күш салған жөн. «Ауыл аманаты» жобасы арқылы да қолдау бар. Бос жатқан жерді тиімді пайдаланып, түрлі жобаларды жүзеге асыру керек, – деді Дархан Сатыбалды.
Ауыл ақсақалдары игі жаңалыққа ризашылықтарын білдіріп, ел азаматтарына баталарын берді.
Аталған елді мекенді газбен жабдықтау жүйесінің құрылысы 2021 жылы басталды. Мердігер мекеме – «Жылуэнергоремонт» ЖШС. Қашықтығы 17,184 шақырым болатын газ құбырының құрылысына республикалық бюджеттен 192,88 млн теңге бөлінді. Абонент саны – 113.
Бүгінгі таңда ауылдық округ әкімі аппараты тарапынан жеке тұрғын үйлерге газ құбырларын монтаждау жұмыстары жүргізу туралы түсіндірме жұмыстарын жүргізіп жатыр.
Демеушілер қаражаты есебінен аз қамтылған отбасының баспанасына монтаждау және құжаттарын заңдастыру жұмыстары да қоса жүруде.
Айта кетейік, Отырар ауданын табиғи газбен қамтамасыз ету мақсатында 2014-2017 жылдары автоматтандырылған газ тарату станциясы (АГТС) салынып, Шәуілдір елді мекеніне дейін 51,4 шақырым газ құбыры тартылды. Автоматтандырылған газ тарату станциясы арқылы 34 елді мекен (халық саны-51426) табиғи газбен қамтамасыз етіледі. 2022 жылы 13 елді мекеннің газ құрылысы аяқталған. Оның ішінде, 12 елді мекен (халық саны – 20759) аудан халқының 40,2 пайызы табиғи газға қосылды.
2023 жылы 9 елді мекенге табиғи газ берілген жағдайда жалпы 16223 халық қосымша табиғи газға қосылып, аудан халқының 72 %-ы табиғи газға қосылуға қол жеткізеді. Олар: Темір, Арыс, М.Шойманов, Қарғалы, Көкмардан, Шытты, Сарыкөл, Сырдария, Отырар.
Сырдария өзенінің батыс бөлігінде орналасқан 12 елді мекенге (Аққұм, Жанкел, Көксарай, Ызакөл, Шеңгелді, Қостерек, Бестам, Маяқұм, Үштам, Көлқұдық, Балтакөл, Ақкөл) газ жеткізу мақсатында 13 жобаға жобалық-сметалық құжат әзірленуде. Аталған жобалар іске асырылған жағдайда 15302 халық табиғи газбен қамтылып, ауданның табиғи газбен қамтылу көрсеткіші 99 құрайды деп күтіліп отыр.
