Мемлекет басшысы Қасым Жомарт Тоқаев Құрылтайдың алғашқы сайлауы қарсаңында Қазақстан халқына үндеу жасап, алдағы дауыс беруді ел тарихындағы маңызды саяси оқиға екенін мәлімдеді, деп хабарлайды dalanews.kz.
Президенттің айтуынша, алдағы жексенбіде жаңа бірпалаталы Құрылтайдың алғашқы сайлауы өтеді. Ол бұл сайлау Қазақстанның қазіргі тарихындағы жаңа кезеңге жол ашатынын атап өтті.
«Бұл сайлау халқымыздың игілігіне қызмет ететін тың реформаларға бастау болып, қазіргі Қазақстан жылнамасындағы жаңа кезеңге жол ашады», - деді Қасым Жомарт Тоқаев.
Мемлекет басшысы сайлауалды науқанның ашық әрі бәсекелі өткенін атап өтті. Партиялар сайлаушылармен кездесулерде, жалпыұлттық теледебаттарда және әлеуметтік желілердегі пікірталастарда өз бағдарламаларын таныстырған.
Президенттің пікірінше, науқан барысында қоғамның қоғамдық күн тәртібінің өзгеріп келе жатқаны байқалды. Жаңа тұлғалар саясат сахнасына шығып, түрлі ұсыныстар айтылған. Қоғамдық пікірталасқа жастар, кәсіби қауымдастық өкілдері мен кәсіпкерлер де белсенді қатысқан.
Қасым Жомарт Тоқаев азаматтардың саяси мәдениеті артып, халықтың мемлекеттік басқару ісіне белсенді араласа бастағанын айтты.
«Азаматтарымыз қастерлі Отанымыздың тағдырына шынайы жанашырлық танытып, еліміздің келешегіне жауапты екенін терең сезінуге тиіс. Сонда ғана Қазақстан одан әрі қарыштап дамиды», - деді Президент.
Сайлауалды науқан отандық және халықаралық байқаушылардың назарында болған. Олар дауыс беру күні де сайлау учаскелеріндегі процестерді бақылайды.
Мемлекет басшысы Құрылтай құрамына кәсіби мамандар мен отаншыл азаматтар сайланады деген сенім білдірді. Оның айтуынша, жаңа орган түрлі көзқарастар тоғысатын және елдің болашағына қатысты бастамалар талқыланатын біртұтас алаңға айналуы тиіс.
Президент геосаяси шиеленіс пен жаһандық сын қатерлер күшейіп отырған кезеңде Қазақстан өз даму бағытын жалғастыруы қажет екенін атап өтті.
«Біз Қазақстан тарихындағы жаңа кезеңге қадам басамыз. Осындай тағдыршешті сәтте әр адамның дауысы маңызды екені сөзсіз», - деді Қасым Жомарт Тоқаев.
Мемлекет басшысы азаматтарды, әсіресе жастарды сайлауға қатысып, өз таңдауын жасауға шақырды.
«Сайлауға қатысу дегеніміз – халықтың өз ықтиярын білдіру, ел тағдырына бей жай қарамай, азаматтық жауапкершілік таныту, ел игілігі үшін өнегелі іс жасау деген сөз», - деді Президент.
