Memleket basshysy Qasym Jomart Toqaev Quryltaidyń alǵashqy sailaýy qarsańynda Qazaqstan halqyna úndeý jasap, aldaǵy daýys berýdi el tarihyndaǵy mańyzdy saiasi oqiǵa ekenin málimdedi, dep habarlaidy dalanews.kz.
Prezidenttiń aitýynsha, aldaǵy jeksenbide jańa birpalataly Quryltaidyń alǵashqy sailaýy ótedi. Ol bul sailaý Qazaqstannyń qazirgi tarihyndaǵy jańa kezeńge jol ashatynyn atap ótti.
«Bul sailaý halqymyzdyń igiligine qyzmet etetin tyń reformalarǵa bastaý bolyp, qazirgi Qazaqstan jylnamasyndaǵy jańa kezeńge jol ashady», - dedi Qasym Jomart Toqaev.
Memleket basshysy sailaýaldy naýqannyń ashyq ári básekeli ótkenin atap ótti. Partiialar sailaýshylarmen kezdesýlerde, jalpyulttyq teledebattarda jáne áleýmettik jelilerdegi pikirtalastarda óz baǵdarlamalaryn tanystyrǵan.
Prezidenttiń pikirinshe, naýqan barysynda qoǵamnyń qoǵamdyq kún tártibiniń ózgerip kele jatqany baiqaldy. Jańa tulǵalar saiasat sahnasyna shyǵyp, túrli usynystar aitylǵan. Qoǵamdyq pikirtalasqa jastar, kásibi qaýymdastyq ókilderi men kásipkerler de belsendi qatysqan.
Qasym Jomart Toqaev azamattardyń saiasi mádenieti artyp, halyqtyń memlekettik basqarý isine belsendi aralasa bastaǵanyn aitty.
«Azamattarymyz qasterli Otanymyzdyń taǵdyryna shynaiy janashyrlyq tanytyp, elimizdiń keleshegine jaýapty ekenin tereń sezinýge tiis. Sonda ǵana Qazaqstan odan ári qaryshtap damidy», - dedi Prezident.
Sailaýaldy naýqan otandyq jáne halyqaralyq baiqaýshylardyń nazarynda bolǵan. Olar daýys berý kúni de sailaý ýchaskelerindegi protsesterdi baqylaidy.
Memleket basshysy Quryltai quramyna kásibi mamandar men otanshyl azamattar sailanady degen senim bildirdi. Onyń aitýynsha, jańa organ túrli kózqarastar toǵysatyn jáne eldiń bolashaǵyna qatysty bastamalar talqylanatyn birtutas alańǵa ainalýy tiis.
Prezident geosaiasi shielenis pen jahandyq syn qaterler kúsheiip otyrǵan kezeńde Qazaqstan óz damý baǵytyn jalǵastyrýy qajet ekenin atap ótti.
«Biz Qazaqstan tarihyndaǵy jańa kezeńge qadam basamyz. Osyndai taǵdyrsheshti sátte ár adamnyń daýysy mańyzdy ekeni sózsiz», - dedi Qasym Jomart Toqaev.
Memleket basshysy azamattardy, ásirese jastardy sailaýǵa qatysyp, óz tańdaýyn jasaýǵa shaqyrdy.
«Sailaýǵa qatysý degenimiz – halyqtyń óz yqtiiaryn bildirý, el taǵdyryna bei jai qaramai, azamattyq jaýapkershilik tanytý, el igiligi úshin ónegeli is jasaý degen sóz», - dedi Prezident.
