Талдықорғанның басты көшесіне Нұрсұлтан Назарбаевтың есімі берілді
Күні кеше ғана тағайындалған жаңа Мемлекет басшысы Қасым-Жомарт Тоқаевтың ұсынысы бойынша, Алматы облысының орталық қаласының басты көшесіне Қазақстанның Тұңғыш президенті, «Халық қаһарманы» атағының иегері Нұрсұлтан Назарбаевтың есімі берілді, – деп хабарлайды өңірлік коммуникациялар қызметі.
Талдықорған қаласының ең ұзын әрі басты көшесі бұрын «Тәуелсіздік» деп аталған. Оның жалпы ұзындығы 6,8 км, ені 16-18 м. Көше қаланың бір шетінен екінші шетіне дейін жалғасады. Оның бойына қаланың ең көрікті нысандары мен тарихи ескерткіштері орналасқан.
Атап айтар болсақ, қазақ билеріне арналған «Үш ата» ескерткіші, қазақтың белгілі ақын-жазушысы Ғали Ормановтың бюсті, қазақ батыры Қаракерей Қабанбайдың және тағы да басқа ескерткіштер. Ал ең көрікті нысандар: Орталық саябақ, «Аквапарк» демалыс орны, І.Жансүгіров атындағы университет, 5 колледж, 2 орта мектеп, орталық алаң, мәдениет сарайы, мұражай және т.б.
Меруерт МАХМҰТЖАН
