Шу қаласындағы орталық ауруханада дәрігерлер жүкті әйел қайтыс болғанын жасырып, марқұмның денесін ғимараттың жертөлесіне тастап кеткен. Қайғылы оқиғаны аурухана қызметкерлері әйелдің туыстарына хабарламаған. Марқұмның денесін бірнеше күн өткен соң, жағымсыз иіс арқылы іздеп жүріп, күйеуі тапқан, – деп хабарлайды Dalanews.kz.

Оқиға наурыздың басында болған. Ауруханаға 25 жастағы жүкті келіншек жоғары қан қысымымен және түсік қаупімен түскен. Ресми расталмаған ақпаратқа сүйенсек, ол бірнеше күн бойы комада болып, жүрек-қан тамырлары жеткіліксіздігінен көз жұмған. Марқұмның туыстары аурухана басшылығы бұл жағдайды әдейі жасырып қалуға тырысты деп санайды.

Бұл жағдай әлеуметтік желі арқылы жұртқа тарап, үлкен резонанс туғызған соң ҚР Денсаулық сақтау министрлігі шұғыл тексеріс жүргізуге кірісті.

"Тергеу аяқталғанша Шу аудандық орталық ауруханасының бас дәрігері мен перзентхана бөлімінің меңгерушісі қызметтерінен уақытша шеттетілді. Жамбыл облыстық денсаулық сақтау басқармасының басшысы Ерік Мұсабаевқа қатаң сөгіс жарияланды", – деп хабарлады Денсаулық сақтау министрлігі.

Министрлік өкілдері медициналық көмек көрсету талаптарын бұзған басқа да қызметкерлер қатаң жауапқа тартылатынын мәлімдеді.

Фейсбуктегі ірі топтардың бірінде Жамбыл тұрғындары облыс әкімі Ербол Қарашөкеев медицина мәселесіне көп көңіл бөлмейтінін айтып, наразылық білдірген болатын.

"Әкім, қайда қарап отыр? Перзентханаларға камера орнату керек. Аймақтағы елді-мекендер заманауи технологиялардан жұрдаймыз. Медициналық мекемедегі ахуал босануға ыңғайлы болуға тиіс", - деген болатын желі белсенділері.

Артынша ҚР Денсаулық сақтау министрі Ақмарал Әлназарова Жамбыл облысының әкімімен кездесіп, өңірдегі перзентханалардың жұмыс сапасын арттыру мәселесін талқылаған болатын.

Алдағы уақытта Шу қалалық ауруханасының перзентхана бөліміндегі жағдайды жақсарту бойынша нақты шаралар қабылданбақ.