Жалпы Қоғамдық қабылдау барысында қабылдауға жазылған 15 азамат жеке және аудан көлеміндегі шешімін таппай келе жатқан күрделі мәселелер бойынша арыз-шағымдарын жеткізді. 4 азаматтың көтерген мәселелері сол сәтте оң шешімін тапты.
Атап айтқанда Кәрімберді Ақмолдаевтың айтуынша, Достық елді мекеніндегі №59 жалпы орта мектебінің ғимараты 1999 жылы ауыл тұрғындарының күшімен асарлатып салынған. 150 балаға арнап салынған мектепте қазір 535 оқушы білім алуда. Мектеп ғимаратының әбден тозығы жеткендіктен, ғимаратын заман талабына сай жаңадан салу қажет. Арызданушы тұрғынға №59 жалпы орта мектебінің ғимаратын жаңадан салу үшін қажетті жер телімі белгіленіп, жобалық-сметалық құжаты мемлекеттік сараптамадан шыққаны айтылды. Бүгінгі таңда мектеп құрылысына 1,148 млн қаржы қарастырылған. Яғни, мектеп жақында салынады.
Лилия Габидулина ауданға өзге мемлекеттен тарихи Отанына қоныс аударған қандастарымыздың азаматтық алуы, құжаттарын белгіленген уақытта ала алмауы өзекті екенін айтты. Бұл өтініш шешімін тауып, облыстық мекеме басшылары тарапынан көмек көрсетілді.
Таңатар Қолдасов жеке меншік мектеп ашу үшін кәсіпкерлер палатасы арқылы агроқаражат ұйымынан несие алуға құжаттарын тапсырған. Бірақ сол мектепке лицензия ала алмай жүр. Бұл тұрғынға аудандық білім бөлімінің ықпалымен «Е-лицензия» базасы арқылы лицензия алу үшін құжаттары рәсімделетін болды.
Аманкелді Белқожа Қабланбек ауылдық округі, Қанағат елді мекеніне табиғи газ қосу мәселесін көтерді. Оған аталған елді мекенді табиғи газбен қамтамасыз ету құрылыс жұмыстары аяқталғаны хабарланды. Өтінішке сәйкес, 172 тұрғын үйді табиғи газға қосу мәселесі 2 апта көлемінде шешілетін болды.
Қоғамдық қабылдау барысында өзге де азаматтардың мәселелері бойынша тиісті департамент және басқарма башсылары мен аудандық бөлім және мекеме басшылары жауап берді. Сондай-ақ, аудан әкімі, аудандық филиал төрағасы Мұхит Отаршиев пен аудан прокуроры Жомарт Нұрғали қабылдауға келген азаматтарға толыққанды заң аясында түсініктемелерін берді. Облыстық филиал төрағасының Бірінші орынбасары Бейсен Тәжібаев көшпелі қоғамдық қабылдау жиынын қорыта келе көтерілген мәселелер партия бақылауында болатынын жеткізді.
Көшпелі қоғамдық қабылдау барысы «Facebook» әлеуметтік желісінде тікелей көрсетіліп, аудандық «Сәт» телеарнасы арқылы түсірілді. Мәселесі оң шешім тапқан азаматтар телеарна арқылы алғыстарын жеткізді.
«Nur Otan» партиясы Түркістан облыстық филталының баспасөз қызметі
