Фермерлер алдындағы қарыздар өсіп келеді, бірақ Ауыл шаруашылығы министрлігі бәрі бақылауда екенін мәлімдейді. Министр Айдарбек Сапаров аграршыларды қаржыландыру бойынша есеп берді, деп хабарлайды Dalanews.kz Orda.kz-ке сілтеп.
Брифинг барысында журналистер фермерлер алдындағы қарыз толық қашан жабылатынын сұрағанымен,нақты жауап берілген жоқ. Фермерлер уәде етілген төлемдерді бірнеше жылдан бері күтіп келеді.
Сапаровтың айтуынша, қазіргі уақытта күту парағында 194 млрд теңге тұр, ал минералды тыңайтқыштарға резервтен тағы 48 млрд теңге бөлінеді. Жалпы, 2025 жылғы бюджетте аграршыларға 400 млрд теңгеден астам қаржы қарастырылған, бірақ төлемдер «біртіндеп, жоспарға сай» жүргізілуде.
“5 % жеңілдетілген несиеге келсек, сіздер білесіздер, 2024 жылдың 29 қарашасында қаржыландыруды бастадық. Қазірдің өзінде 205 млрд теңгеге өтінімдер түсті, және адамдар қаржыландыру алып жатыр. Көктемгі егіс және егін жинау жұмыстарына шамамен 700 млрд теңге бөлінді. Бұдан бөлек, 200 млрд теңге 5 % жеңілдетілген лизингке бөлінеді”, – деді Сапаров.
Министр фермерлерді субсидияның өздеріне тікелей байланысты екенін түсінуге шақырды. Мысалы, олар қаншалықты көп тыңайтқыш сатып алса, соншалықты көп өтемақы қажет болады.
Журналистер министрден фермерлердің шағымдарына қатысты пікір білдіруін сұрады. Көптеген диқан, әсіресе астық өсірушілер, өздерін асыраудың өзі қиын екенін айтып отыр. Кейбіреулері тіпті Ауыл шаруашылығы министрлігі ауыл шаруашылығын жойғысы келеді деп күдіктенеді (редакцияға осындай шағымдар келіп түскен).
“Қай шаруашылықты жойғалы жатырмыз? Ауыл шаруашылығы министрлігі тек қолдау көрсетіп, бағдарламалар жасап, мемлекеттік қолдауды арттырып жатыр. Кім? Егер ол дұрыс жұмыс істемесе, мәселені шешеміз. Маған фермердің фамилиясын беріңіздер, онымен сөйлесіп, анықтаймыз”, дейді Сапаров.
Сапаров сыбайлас жемқорлық мәселесін де қозғады. Министр бұл проблеманың бар екенін мойындап, оны болдырмау үшін автоматтандырылған жүйе жұмыс істейтінін және құқық қорғау органдары кінәлілерді бәрібір табатынын айтты.
Министр нақты шешім ретінде фермерлердің фамилияларын атап, әрбір жағдайды жеке қарастыруды ұсынды.
