Қазақстанда 2025 жылы халықтың жан басына шаққандағы орташа атаулы ақшалай табысы 10,6 пайызға өскенімен, инфляцияны ескергендегі нақты табыс 0,7 пайызға төмендеді, деп хабарлайды dalanews.kz.
Бұл туралы Ұлттық статистика бюросының 2025 жылғы халықтың ақшалай табыстары жөніндегі деректерінде айтылған. Өткен жылы бір адамға шаққандағы орташа атаулы ақшалай табыс айына 238 862 теңгені құрады. 2024 жылы бұл көрсеткіш 215 979 теңге болған.
Алайда табыстың номиналды түрде өсуі халықтың сатып алу мүмкіндігі дәл сондай артты дегенді білдірмейді. Статистика бюросының мәліметінше, 2025 жылы тұтыну бағаларының индексі 11,4 пайызды құраған. Бағаның осы өсімі ескерілгенде, халықтың нақты ақшалай табысы 0,7 пайызға төмендеген.
Өңірлер арасында табыс деңгейі айтарлықтай ерекшеленеді. Ең жоғары орташа жан басына шаққандағы атаулы табыс Алматы қаласында тіркелген – 380 637 теңге. Екінші орында Астана тұр – 341 252 теңге. Ұлытау облысында бұл көрсеткіш 327 898 теңге, Атырау облысында 306 184 теңге болды.
Ал ең төмен көрсеткіш Түркістан облысында тіркелді – 131 848 теңге. Шымкентте орташа табыс 153 908 теңге, Жамбыл облысында 164 727 теңге, Қызылорда облысында 169 345 теңге болды.
Осылайша, ең жоғары және ең төмен көрсеткіш арасындағы айырмашылық 2,9 есеге жетеді. Бұл ретте нақты ақшалай табыс бірқатар өңірде де төмендеген. Мәселен, Атырау облысында нақты табыс индексі 83,2 пайызды, Қарағанды облысында 96,5 пайызды, Маңғыстау облысында 95,4 пайызды құрады.
Сонымен бірге кейбір өңірлерде халықтың атаулы табысы ғана емес, нақты табысы да өскен. Нақты табыстың ең жоғары өсімі Жетісу облысында тіркелді – 5,9 пайыз. Ақмола облысында 1,8 пайыз, Алматы облысында 2,4 пайыз өсім болды.
Статистика бюросы атаулы ақшалай табыс көрсеткішіне тек жалақы емес, өзін-өзі жұмыспен қамтудан түсетін кіріс, әлеуметтік трансферттер және басқа да ақшалай табыстар кіретінін атап өтеді. Сондықтан бұл көрсеткішті орташа жалақымен теңестіруге болмайды.
Жалпы алғанда, 2025 жылғы статистика Қазақстанда халықтың ақшалай кірістері номиналды түрде артқанымен, бағаның өсуі бұл өсімді толық өтеп отырғанын көрсетеді. Нәтижесінде ел бойынша нақты ақшалай табыс бір жыл ішінде 0,7 пайызға қысқарған.
