Қазақстанда автокөліктерге заң талаптарына сай келмейтін сертификаттар берген жеті зертхананың жұмысы тоқтатылды. Бұл туралы Сауда және интеграция министрі Арман Шаққалиев мәлімдеді, деп хабарлайды dalanews.kz.
Министрдің айтуынша, кейбір зертханалар көліктерді толық техникалық тексеруден өткізбей-ақ сертификат берген. Тіпті кейбір жағдайда қажет сынақтар жүргізілмей, құжаттар тек формалды деректердің негізінде рәсімделген.
"Біз жеті зертхананың жұмысын тоқтаттық. Олар көліктерді толық сынақтан өткізбеген немесе тек қағаз жүзіндегі мәліметтерге сүйеніп сертификат берген. Мұндай заңсыздықтарға жол берген мекемелерге қатысты шаралар әрі қарай да жалғасады", - деді Арман Шаққалиев.
Оның сөзінше, қабылданып жатқан өзгерістердің негізгі мақсаты – Қазақстандағы сертификаттау талаптарын Еуразиялық экономикалық одақтың ортақ стандарттарына сәйкестендіру және техникалық тексеруден өтпеген көліктердің жолға шығуына жол бермеу.
Сондай-ақ министр алдағы уақытта ескі, қайта жабдықталған және қауіпсіздік талаптарына сәйкес келмейтін көліктердің Қазақстанға әкелінуіне бақылау күшейтілетінін айтты.
"Үкіметтің басты міндеті - жол қауіпсіздігін қамтамасыз ету. Қазақстан техникалық талапқа сай келмейтін көліктердің жиналатын орнына айналмауы тиіс", - деді министр.
Арман Шаққалиев жаңа талаптардың отандық автозауыттар мен ресми дилерлердің мүддесін қорғауға бағытталғаны туралы пікірді жоққа шығарды.
