Үкіметке депутаттық сауал жолдаған Е.Бейсенбаев бюджеттен бөлініп жатқан қаражаттың тұрақты емес, уақытша жұмыс орындарын ашуға жұмсалып жатқанын атап өтті.
«Жұмыссыздық деңгейі кейінгі 5 жылда 5% шамасында сақталып отыр. Бұл көрсеткішке ешкімнің сенбейтіні анық. Алайда, тәуелсіз сарапшылардың бағалауы бойынша, Қазақстандағы жұмыссыздықтың шынайы деңгейі 9-10%-дан кем емес. Бұл – кемі 900 мың адам деген сөз, яғни екі есеге көп. Ал бюджеттен бөлінетін қаржы тек уақытша жұмыс орындарын ашуға, оның ішінде әлеуметтік-экономикалық тиімділікті сақтау үшін жұмсалып отыр», - деп атап өтті депутат.
Ол сондай-ақ, халықтың тұрмысы төмендегенін, азық-түлік керісінше қымбаттағанын айтып, Үкіметтен оған қарсы шара қолдануды талап етті.
«Халықтың несие алу деңгейі де өте жоғары. Мысалы 2022 жылы тұтынушылық несие – 30 процентке, яғни 13,2 трлн теңгеге дейін өсті. Бұл бюджетке түсетін салықтық түсімдермен шамалас қаражат. Яғни, аталған көрсеткіш – халықтың төлем қабілетінің төмендеуінің көрсеткіші», - деді ол.
Елнұр Бейсенбаев Ұлттық қор қаражатының бюджеттің дефицитін жамауға кетіп жатқанын, бюджеттік және салықтық әкімшілендіру жүйесіндегі кемшіліктерді тізбектей келе, Үкіметке бірнеше ұсыныс пен талабын айтты. Олар:
- Мемлекеттік жоспарлау жүйесін жетілдіруді бюджеттік бағдарламаларды тексеруден және оларды дұрыс жіктеуден бастау қажет.
- Жаңа стратегиялық құжаттарды ойлап табудың қажеті жоқ. Стратегиялық құжаттар – бұл Мемлекет басшысының Жолдауы, Ұлттық жобалар, «AMANAT» партиясының сайлауалды бағдарламасы.
- Негізгі мақсат бюджет қаражатын игеру емес, ал оңтайлы нәтижеге қол жеткізуді басты индикатор ретінде қарастыру керек.
- Үкімет бюджеттік нақтылауды тек пайыздық көрсеткіштерді көтеру мақсатында емес, керісінше тұралап қалған жобаларға қосымша қаражат қарастыру үшін пайдалануы керек.
