Úkimetke depýtattyq saýal joldaǵan E.Beisenbaev biýdjetten bólinip jatqan qarajattyń turaqty emes, ýaqytsha jumys oryndaryn ashýǵa jumsalyp jatqanyn atap ótti.
«Jumyssyzdyq deńgeii keiingi 5 jylda 5% shamasynda saqtalyp otyr. Bul kórsetkishke eshkimniń senbeitini anyq. Alaida, táýelsiz sarapshylardyń baǵalaýy boiynsha, Qazaqstandaǵy jumyssyzdyqtyń shynaiy deńgeii 9-10%-dan kem emes. Bul – kemi 900 myń adam degen sóz, iaǵni eki esege kóp. Al biýdjetten bólinetin qarjy tek ýaqytsha jumys oryndaryn ashýǵa, onyń ishinde áleýmettik-ekonomikalyq tiimdilikti saqtaý úshin jumsalyp otyr», - dep atap ótti depýtat.
Ol sondai-aq, halyqtyń turmysy tómendegenin, azyq-túlik kerisinshe qymbattaǵanyn aityp, Úkimetten oǵan qarsy shara qoldanýdy talap etti.
«Halyqtyń nesie alý deńgeii de óte joǵary. Mysaly 2022 jyly tutynýshylyq nesie – 30 protsentke, iaǵni 13,2 trln teńgege deiin ósti. Bul biýdjetke túsetin salyqtyq túsimdermen shamalas qarajat. Iaǵni, atalǵan kórsetkish – halyqtyń tólem qabiletiniń tómendeýiniń kórsetkishi», - dedi ol.
Elnur Beisenbaev Ulttyq qor qarajatynyń biýdjettiń defitsitin jamaýǵa ketip jatqanyn, biýdjettik jáne salyqtyq ákimshilendirý júiesindegi kemshilikterdi tizbektei kele, Úkimetke birneshe usynys pen talabyn aitty. Olar:
- Memlekettik josparlaý júiesin jetildirýdi biýdjettik baǵdarlamalardy tekserýden jáne olardy durys jikteýden bastaý qajet.
- Jańa strategiialyq qujattardy oilap tabýdyń qajeti joq. Strategiialyq qujattar – bul Memleket basshysynyń Joldaýy, Ulttyq jobalar, «AMANAT» partiiasynyń sailaýaldy baǵdarlamasy.
- Negizgi maqsat biýdjet qarajatyn igerý emes, al ońtaily nátijege qol jetkizýdi basty indikator retinde qarastyrý kerek.
- Úkimet biýdjettik naqtylaýdy tek paiyzdyq kórsetkishterdi kóterý maqsatynda emes, kerisinshe turalap qalǵan jobalarǵa qosymsha qarajat qarastyrý úshin paidalanýy kerek.
