Мәжіліс депутаттары Еуразиялық экономикалық одақ пен Біріккен Араб Әмірліктері арасындағы экономикалық әріптестік туралы келісімді ратификациялау жөніндегі заң жобасын мақұлдап, құжатты Сенатқа жіберді, деп хабарлайды dalanews.kz.
Қосымша баяндамада айтылғандай, келісім 2025 жылғы 27 маусымда Минск қаласында жасалған. Оның негізгі мақсаты – ЕАЭО елдері мен Біріккен Араб Әмірліктері арасындағы сауда-экономикалық байланыстарды дамыту және қазақстандық тауарлардың Парсы шығанағы нарығына шығуына қолайлы жағдай қалыптастыру.
Депутат Абзал Әбдиевтің мәліметінше, Біріккен Араб Әмірліктері Қазақстанның Таяу Шығыстағы негізгі экономикалық серіктестерінің бірі саналады. Жаңа келісім тараптар арасындағы сауда, инвестиция және экономикалық ынтымақтастықты кеңейтуге құқықтық негіз қалыптастыруы тиіс.
Құжат бойынша Сауда және интеграция министрлігі толық түсіндірме берген. Заң жобасы Мәжілістегі жұмыс тобы мен профильдік комитеттердің қарауынан өтіп, оң қорытынды алған.
Депутаттардың пікірінше, келісімді ратификациялау қазақстандық экспорттаушылар үшін жаңа мүмкіндіктер ашып, отандық өнімдердің Біріккен Араб Әмірліктері нарығындағы үлесін арттыруға ықпал етуі мүмкін.
Мәжіліс заң жобасын қолдап, оны Парламент Сенатының қарауына жіберу туралы шешім қабылдады.
