Қазақстан Транскаспий халықаралық көлік бағытын дамыту аясында Ақтау портындағы түбін тереңдету жұмыстарын жыл соңына дейін аяқтауды жоспарлап отыр, деп хабарлайды dalanews.kz.
Үкіметтің мәліметінше, жоба теңіздегі кеме қатынасы қауіпсіздігін арттыруға және осы бағыттың өткізу мүмкіндігін ұлғайтуға бағытталған.
Жобаның мердігері - қытайлық China Harbour Engineering Company Ltd. Компания геодезиялық зерттеулер жүргізіп, жұмыстарға қажет деректі өңдеуді аяқтаған. Қазір арнайы кемелер, техника мен жабдықтар жұмылдырылып жатыр.
Негізгі жұмыстарды биыл шілденің екінші жартысында бастау жоспарланған. Жоба толық аяқталғаннан кейін порт аумағындағы тереңдік 6-7 метрге дейін ұлғаяды. Бұл кемелерді толық жүктеуге және жүктерді өңдеу тиімділігін арттыруға мүмкіндік береді.
2028 жылға қарай Транскаспий халықаралық көлік бағытының өткізу мүмкіндігін жылына 6 млн тоннадан 10 млн тоннаға дейін арттыру жоспарланып отыр. Бұл Қазақстанның Шығыс пен Батысты байланыстыратын маңызды көлік-логистикалық торап ретіндегі рөлін күшейтуге мүмкіндік береді.
Бұл - Қытайды Қазақстан, Каспий теңізі, Әзербайжан және Грузия арқылы Еуропа елдерімен байланыстыратын халықаралық көлік бағыты.
