2014 жылдың 8 наурызында жоғалған Malaysia Airlines әуе компаниясының Boeing 777-200ER ұшағы ХХІ ғасырдағы ең жұмбақ авиациялық оқиғалардың бірі ретінде тарихта қалды, деп хабарлайды dalanews.kz.
Куала-Лумпурдан Бейжіңге бағыт алған ұшақ әуеге көтерілгеннен кейін шамамен 40 минут өткен соң Оңтүстік Қытай теңізі үстінде радардан ғайып болған. Бортта 227 жолаушы мен 12 экипаж мүшесі болғанымен, апаттың нақты неден болғаны мен ұшақтың нақты қайда құлағаны әлі күнге дейін анықталмаған.
Дереккөздің мәліметінше, байланыс үзілгеннен кейін лайнер бірнеше сағат бойы әуеде болған. Әскери радарлар ұшақтың бағытын өзгертіп, Малакка бұғазы арқылы Үнді мұхитының оңтүстік бөлігіне қарай ұшқанын тіркеген.
Ұшақ соңғы рет Никобар аралдарына жақын маңда байқалған. Кейін Африка жағалауынан табылған кейбір бөлшектер осы Boeing-ке тиесілі болуы мүмкін деген болжам айтылғанымен, бұл деректер толық дәлелденбеген.
Ұшақтағы жолаушылар 14 елдің азаматтары болған. Олардың басым бөлігі Қытай азаматтары еді. Сондай-ақ бортта ресейлік кәсіпкер Николай Бродский де болған.
Тергеу барысында ұрланған төлқұжатпен ұшқан екі жолаушы – Пурия Нур Мохаммад Мердад пен Сейед Мохаммед Реза Делаварға да назар аударылған. Алайда кейін олардың лаңкестікке қатысы жоқ екені, тек шетелге заңсыз шығуға әрекет жасағаны анықталған.
Сонымен бірге тергеушілер ұшақ командирі Захари Ахмад Шахтың жеке өмірін де зерттеген. Ұзақ жылдық тәжірибесі бар пилоттың ажырасудан кейін психологиялық күйзеліске түскені айтылған. Кейбір нұсқаларда екінші пилот Фарик Абдул Хамидтің де ықтимал қатысы қарастырылған.
Ұшақ жоғалар алдындағы диспетчерлер естіген соңғы сөз – "Қайырлы түн" болған. Сол бір қарапайым сөздің астарында бүгінге дейін шешілмеген үлкен құпия жатыр.
