Оқу-ағарту министрлігінің Орта білім беру комитетінің төрағасы Қаныбек Жұмашев кейбір қазақстандық мұғалімдердің мерекелік сыйақы алуы, ал енді бір бөлігінің мұндай төлемге қол жеткізбеу себептерін түсіндірді, деп хабарлайды Dalanews.kz.

Орталық коммуникациялар қызметінде өткен брифинг барысында комитет басшысы елдегі білім беру ұйымдарының қаржыландыру жүйесі біркелкі емес екенін айтты. Оның сөзінше, Қазақстанда шамамен 8 мың мектеп бар және олардың қаржылық есептері 220-ға жуық аудандық және қалалық білім бөлімдері арқылы қабылданып, келесі жылға арналған бюджеттер сол деңгейде бекітіледі.

— Мұғалімдерге берілетін бонустардың көлемі мен мүмкіндігі әр өңірдің қаржылық әлеуетіне тікелей байланысты. Кіріс көздері жоғары және қаражат мектептер арасында біркелкі бөлінген жерлерде мұғалімдердің бонустар алу ықтималдығы айтарлықтай жоғары, — деді Қаныбек Жұмашев.

Ол сондай-ақ ауылдық жерлерде мұғалім мамандығы салыстырмалы түрде жоғары жалақы төленетін кәсіптердің бірі екенін атап өтті. Ұлттық мерекелер қарсаңында педагогтерге қосымша сыйақы қарастырылатын жағдайлар да бар.

Комитет төрағасының айтуынша, мұндай төлемдер көбіне білім беру ұйымдарының жылдық бюджетінде қалыптасқан үнемдеу есебінен жүзеге асырылады. Әсіресе жаңа басқару моделіне көшкен, қаржылық дербестігі бар мектептерде оң нәтижелер байқалып отыр.

— Бізде бар мәліметке сәйкес, экономикалық басқару құқығына ие мектептерде әрбір ұлттық мереке алдында мұғалімдерге белгілі бір көлемде сыйақы төленіп келеді, — деді ол.

Жұмашевтің сөзінше, мұндай төлемдер мектептің жалпы жылдық бюджетінде қалған қаражат шеңберінде жүзеге асырылады.