Қазақстанның Бәсекелестікті қорғау және дамыту агенттігі (БҚДА) 2024–2025 жылдардағы кино көрсету нарығына жүргізген талдау нәтижесінде Kinopark кинотеатрлар желісінің фильмдерді жарнамалауға байланысты міндетті төлемдер талап еткенін анықтады, деп хабарлайды dalanews.kz.
Агенттік мәліметінше, еліміздегі ең ірі кинотеатрлар желісі зерттелген нарықтың шамамен 48%-ын иеленген. Ал кинопродюсерлер фильмдерді прокатқа шығару үшін қосымша жарнамалық ілгерілету қызметіне ақы төлеуге мәжбүр болған. Мұндай шығын көлемі 20 миллионнан 60 миллион теңгеге дейін жеткен.
Тексеру барысында БҚДА кинематографистердің шағымдарын растады. Олардың айтуынша, мәселе тек жарнамаға қатысты болмаған. Kinopark фильмдердің көрсетілім кестесін алғашқы демалыс күндерінің өзінде өзгертіп отырған. Кейбір туындыларға негізінен таңғы және күндізгі сеанстар ғана беріліп, көрсетілім саны қысқартылған немесе кассалық түсім төмен болған жағдайда фильм прокаттан мүлде алынып тасталған.
Талдау қорытындысында агенттік «жарнаманы күштеп таңу» және фильмдерді ілгерілету үшін міндетті төлемдер алу фактілерін атап өтті.
Осыған байланысты Kinopark желісіне Кәсіпкерлік кодекстің 174-бабы бойынша хабарлама жолданған. Реттеуші орган компаниядан жарнаманы міндетті шарт ретінде қою тәжірибесін тоқтатуды, фильмдерді прокатқа шығару үшін алынатын міндетті төлемдерді жоюды және серіктестеріне жарнама қызметі міндетті талап емес екенін хабарлауды талап етті. Сонымен қатар фильмдерді прокатқа енгізу және сеанстар санын өзгерту тәртібі бойынша бірыңғай әрі ашық ережелер әзірлеу міндеттелді.
БҚДА мәліметінше, нәтижесінде Kinopark 16 наурыздан бастап фильмдерді прокатқа шығару үшін алынатын міндетті төлемдерді тоқтатып, жарнаманы күштеп таңдау тәжірибесінен бас тартқан.
