Qazaqstannyń Básekelestikti qorǵaý jáne damytý agenttigi (BQDA) 2024–2025 jyldardaǵy kino kórsetý naryǵyna júrgizgen taldaý nátijesinde Kinopark kinoteatrlar jelisiniń filmderdi jarnamalaýǵa bailanysty mindetti tólemder talap etkenin anyqtady, dep habarlaidy dalanews.kz.
Agenttik málimetinshe, elimizdegi eń iri kinoteatrlar jelisi zerttelgen naryqtyń shamamen 48%-yn ielengen. Al kinoprodiýserler filmderdi prokatqa shyǵarý úshin qosymsha jarnamalyq ilgeriletý qyzmetine aqy tóleýge májbúr bolǵan. Mundai shyǵyn kólemi 20 millionnan 60 million teńgege deiin jetken.
Tekserý barysynda BQDA kinematografisterdiń shaǵymdaryn rastady. Olardyń aitýynsha, másele tek jarnamaǵa qatysty bolmaǵan. Kinopark filmderdiń kórsetilim kestesin alǵashqy demalys kúnderiniń ózinde ózgertip otyrǵan. Keibir týyndylarǵa negizinen tańǵy jáne kúndizgi seanstar ǵana berilip, kórsetilim sany qysqartylǵan nemese kassalyq túsim tómen bolǵan jaǵdaida film prokattan múlde alynyp tastalǵan.
Taldaý qorytyndysynda agenttik «jarnamany kúshtep tańý» jáne filmderdi ilgeriletý úshin mindetti tólemder alý faktilerin atap ótti.
Osyǵan bailanysty Kinopark jelisine Kásipkerlik kodekstiń 174-baby boiynsha habarlama joldanǵan. Retteýshi organ kompaniiadan jarnamany mindetti shart retinde qoiý tájiribesin toqtatýdy, filmderdi prokatqa shyǵarý úshin alynatyn mindetti tólemderdi joiýdy jáne seriktesterine jarnama qyzmeti mindetti talap emes ekenin habarlaýdy talap etti. Sonymen qatar filmderdi prokatqa engizý jáne seanstar sanyn ózgertý tártibi boiynsha biryńǵai ári ashyq erejeler ázirleý mindetteldi.
BQDA málimetinshe, nátijesinde Kinopark 16 naýryzdan bastap filmderdi prokatqa shyǵarý úshin alynatyn mindetti tólemderdi toqtatyp, jarnamany kúshtep tańdaý tájiribesinen bas tartqan.
