قازاقستاننىڭ بەسەكەلەستٸكتٸ قورعاۋ جەنە دامىتۋ اگەنتتٸگٸ (بقدا) 2024–2025 جىلدارداعى كينو كٶرسەتۋ نارىعىنا جٷرگٸزگەن تالداۋ نەتيجەسٸندە Kinopark كينوتەاترلار جەلٸسٸنٸڭ فيلمدەردٸ جارنامالاۋعا بايلانىستى مٸندەتتٸ تٶلەمدەر تالاپ ەتكەنٸن انىقتادى, دەپ حابارلايدى dalanews.kz.
اگەنتتٸك مەلٸمەتٸنشە, ەلٸمٸزدەگٸ ەڭ ٸرٸ كينوتەاترلار جەلٸسٸ زەرتتەلگەن نارىقتىڭ شامامەن 48%-ىن يەلەنگەن. ال كينوپروديۋسەرلەر فيلمدەردٸ پروكاتقا شىعارۋ ٷشٸن قوسىمشا جارنامالىق ٸلگەرٸلەتۋ قىزمەتٸنە اقى تٶلەۋگە مەجبٷر بولعان. مۇنداي شىعىن كٶلەمٸ 20 ميلليوننان 60 ميلليون تەڭگەگە دەيٸن جەتكەن.
تەكسەرۋ بارىسىندا بقدا كينەماتوگرافيستەردٸڭ شاعىمدارىن راستادى. ولاردىڭ ايتۋىنشا, مەسەلە تەك جارناماعا قاتىستى بولماعان. Kinopark فيلمدەردٸڭ كٶرسەتٸلٸم كەستەسٸن العاشقى دەمالىس كٷندەرٸنٸڭ ٶزٸندە ٶزگەرتٸپ وتىرعان. كەيبٸر تۋىندىلارعا نەگٸزٸنەن تاڭعى جەنە كٷندٸزگٸ سەانستار عانا بەرٸلٸپ, كٶرسەتٸلٸم سانى قىسقارتىلعان نەمەسە كاسسالىق تٷسٸم تٶمەن بولعان جاعدايدا فيلم پروكاتتان مٷلدە الىنىپ تاستالعان.
تالداۋ قورىتىندىسىندا اگەنتتٸك «جارنامانى كٷشتەپ تاڭۋ» جەنە فيلمدەردٸ ٸلگەرٸلەتۋ ٷشٸن مٸندەتتٸ تٶلەمدەر الۋ فاكتٸلەرٸن اتاپ ٶتتٸ.
وسىعان بايلانىستى Kinopark جەلٸسٸنە كەسٸپكەرلٸك كودەكستٸڭ 174-بابى بويىنشا حابارلاما جولدانعان. رەتتەۋشٸ ورگان كومپانييادان جارنامانى مٸندەتتٸ شارت رەتٸندە قويۋ تەجٸريبەسٸن توقتاتۋدى, فيلمدەردٸ پروكاتقا شىعارۋ ٷشٸن الىناتىن مٸندەتتٸ تٶلەمدەردٸ جويۋدى جەنە سەرٸكتەستەرٸنە جارناما قىزمەتٸ مٸندەتتٸ تالاپ ەمەس ەكەنٸن حابارلاۋدى تالاپ ەتتٸ. سونىمەن قاتار فيلمدەردٸ پروكاتقا ەنگٸزۋ جەنە سەانستار سانىن ٶزگەرتۋ تەرتٸبٸ بويىنشا بٸرىڭعاي ەرٸ اشىق ەرەجەلەر ەزٸرلەۋ مٸندەتتەلدٸ.
بقدا مەلٸمەتٸنشە, نەتيجەسٸندە Kinopark 16 ناۋرىزدان باستاپ فيلمدەردٸ پروكاتقا شىعارۋ ٷشٸن الىناتىن مٸندەتتٸ تٶلەمدەردٸ توقتاتىپ, جارنامانى كٷشتەپ تاڭداۋ تەجٸريبەسٸنەن باس تارتقان.
