Қайтарылған активтер есебінен Ақмола облысының 10 ауылында жаңа медициналық нысандар салынады, – деп хабарлайды Dalanews.kz
Мемлекет басшысының тапсырмасына сәйкес, Үкімет елге қайтарылған заңсыз иемденілген активтер есебінен әлеуметтік маңызы бар инфрақұрылым салу жөніндегі жобаларды жүзеге асырып келеді.
"Облыстың бірқатар ауылында жаңа фельдшерлік-акушерлік пункттер (ФАП) мен дәрігерлік амбулаториялар құрылысын аяқтау жұмыстарына Арнаулы мемлекеттік қордан 1,7 млрд теңге бөлу туралы шешім қабылданды", - делінген хабарламада.
Барлығы 4 дәрігерлік амбулатория, 5 фельдшерлік-акушерлік пункт және 1 медициналық пункт салынады. Әр ауысымда 405 науқасты қабылдай алатын дәрігерлік нысандар ауылдық жерлерде халықтың сапалы медициналық көмекке қолжетімділігін едәуір жақсартуға мүмкіндік береді.
Ақмола облысында мына ауылдарда дәрігерлік амбулаториялар салынады:
- Аршалы ауданы Арнасай ауылы;
- Астрахан ауданындағы Ескі Қалқұтан ауылы;
- Жарқайың ауданы Пятигорское ауылы;
- Целиноград ауданы Жаңа Есіл ауылы.
Сондай-ақ:
- Жақсы ауданы Киров ауылы;
- Целиноград ауданы Жарлыкөл ауылы;
- Бұланды ауданы Партизанка ауылы;
- Бұланды ауданы Алтынды ауылы;
- Шортанды ауданы Пригородное ауылында ФАП-тар салынады.
Целиноград ауданының Шалқар ауылында медициналық пункт пайдалануға беріледі.
