Қазақстан Төтенше жағдайлар министрлігі Батыс Қазақстан облысында үш жылдан астам уақыт бұрын апатқа ұшыраған Ми-8 тікұшағына байланысты сақтандыру компаниясымен соттасып жатыр. Даудың басы – өтемақы көлемі. Кей деректерге сәйкес, талап етіліп отырған сома әуе кемесінің құнынан да асып түседі, деп хабарлайды dalanews.kz журналист Михаил Козачковқа сілтеме жасап.
Апат қалай болған?
Оқиға Батыс Қазақстан облысының Бәйтерек ауданында болған. ТЖМ-ге қарасты «Қазавиақұтқару» АҚ-ның Ми-8 тікұшағы жерге құлап, салдарынан экипаждың төрт мүшесі қаза тапқан.
«Қазавиақұтқару» ұйымы әдетте құтқару операцияларына қатысып, шалғай аймақтардан науқастар мен зардап шеккендерді эвакуациялау, гуманитарлық жүк жеткізу, өрт сөндіру және төтенше жағдайлардың салдарын жою жұмыстарын атқарады.
Алайда апат болған күні тікұшақ «ҚазТрансОйлға» тиесілі мұнай құбырын бақылау мақсатындағы коммерциялық рейс орындаған. Тергеу материалдарына сәйкес, қолайсыз ауа райына байланысты экипаж ұшу әуежайына қайту туралы шешім қабылдаған. Бірақ бұрылу кезінде тікұшақ жерге соғылған.
Қазір осы іс бойынша әуе кемесінің командирі Дәулетбай Қанатов пен екінші ұшқыш Владимир Афанасьевке қатысты сот процесі жүріп жатыр. Олардың мүддесін туыстары қорғауда.
ТЖМ мен сақтандыру компаниясы арасындағы дау
Сонымен қатар Алматы қаласының мамандандырылған ауданаралық экономикалық сотында осы тікұшаққа қатысты тағы бір іс қаралып жатыр. Онда ТЖМ сақтандыру нарығындағы «Еуразия» компаниясынан Ми-8 тікұшағының жоғалуына байланысты өтемақы өндіріп алуды талап еткен. Бейресми мәліметтер бойынша, талап сомасы шамамен 8 миллиард теңге.
Сақтандыру компаниясының мәлімдеуінше, олар өтемақы төлеуден бас тартпайды. Алайда ТЖМ мен «Қазавиақұтқару» сақтандыру жағдайын толық бағалау үшін қажетті құжаттардың бәрін әлі тапсырмаған.
Неге дау туындады?
«Еуразияның» түсіндіруінше, тараптар негізінен өтемақы көлеміне қатысты келісе алмай отыр. Компанияның айтуынша, талап арызда тек апатқа ұшыраған тікұшақтың құны ғана емес, қосымша жабдықтар мен қосалқы бөлшектер үшін де өтемақы төлеу көзделген. Ал сақтандырушының пікірінше, олардың бір бөлігі апат салдарынан зақымданбағандықтан, нақты келтірілген шығын ғана өтелуі тиіс.
Бұдан бөлек, сақтандыру келісімшартында авиациялық оқиғаның себептері мен мән-жайлары өтемақы төлеу туралы шешім қабылдауда маңызды рөл атқаратыны көрсетілген. Сондай-ақ кейіннен келтірілген шығынды кінәлі тұлғалардан өндіріп алу мәселесі де қарастырылуы мүмкін.
Қоғамда сұрақ туғызған жағдай
Тергеу қорытындысы бойынша, Ми-8 тікұшағы экипаж әрекеттерінің салдарынан апатқа ұшыраған деген тұжырым жасалған. Осыған байланысты ұшқыштарға Қылмыстық кодекстің 344-бабы бойынша айып тағылған.
Сонымен бірге ТЖМ сақтандыру компаниясынан тек әуе кемесінің құнын ғана емес, апаттан зардап шекпеген болуы мүмкін жабдықтар мен қосалқы бөлшектер үшін де өтемақы талап етіп отырғаны қоғамда түрлі сұрақ туғызып отыр. Әзірге министрлік бұл мәселеге қатысты ресми түсініктеме берген жоқ. Іс бойынша түпкілікті қорытынды сот шешімі мен ТЖМ-нің жауабынан кейін белгілі болмақ.
