Qazaqstan Tótenshe jaǵdailar ministrligi Batys Qazaqstan oblysynda úsh jyldan astam ýaqyt buryn apatqa ushyraǵan Mi-8 tikushaǵyna bailanysty saqtandyrý kompaniiasymen sottasyp jatyr. Daýdyń basy – ótemaqy kólemi. Kei derekterge sáikes, talap etilip otyrǵan soma áýe kemesiniń qunynan da asyp túsedi, dep habarlaidy dalanews.kz jýrnalist Mihail Kozachkovqa silteme jasap.
Apat qalai bolǵan?
Oqiǵa Batys Qazaqstan oblysynyń Báiterek aýdanynda bolǵan. TJM-ge qarasty «Qazaviaqutqarý» AQ-nyń Mi-8 tikushaǵy jerge qulap, saldarynan ekipajdyń tórt múshesi qaza tapqan.
«Qazaviaqutqarý» uiymy ádette qutqarý operatsiialaryna qatysyp, shalǵai aimaqtardan naýqastar men zardap shekkenderdi evakýatsiialaý, gýmanitarlyq júk jetkizý, órt sóndirý jáne tótenshe jaǵdailardyń saldaryn joiý jumystaryn atqarady.
Alaida apat bolǵan kúni tikushaq «QazTransOilǵa» tiesili munai qubyryn baqylaý maqsatyndaǵy kommertsiialyq reis oryndaǵan. Tergeý materialdaryna sáikes, qolaisyz aýa raiyna bailanysty ekipaj ushý áýejaiyna qaitý týraly sheshim qabyldaǵan. Biraq burylý kezinde tikushaq jerge soǵylǵan.
Qazir osy is boiynsha áýe kemesiniń komandiri Dáýletbai Qanatov pen ekinshi ushqysh Vladimir Afanasevke qatysty sot protsesi júrip jatyr. Olardyń múddesin týystary qorǵaýda.
TJM men saqtandyrý kompaniiasy arasyndaǵy daý
Sonymen qatar Almaty qalasynyń mamandandyrylǵan aýdanaralyq ekonomikalyq sotynda osy tikushaqqa qatysty taǵy bir is qaralyp jatyr. Onda TJM saqtandyrý naryǵyndaǵy «Eýraziia» kompaniiasynan Mi-8 tikushaǵynyń joǵalýyna bailanysty ótemaqy óndirip alýdy talap etken. Beiresmi málimetter boiynsha, talap somasy shamamen 8 milliard teńge.
Saqtandyrý kompaniiasynyń málimdeýinshe, olar ótemaqy tóleýden bas tartpaidy. Alaida TJM men «Qazaviaqutqarý» saqtandyrý jaǵdaiyn tolyq baǵalaý úshin qajetti qujattardyń bárin áli tapsyrmaǵan.
Nege daý týyndady?
«Eýraziianyń» túsindirýinshe, taraptar negizinen ótemaqy kólemine qatysty kelise almai otyr. Kompaniianyń aitýynsha, talap aryzda tek apatqa ushyraǵan tikushaqtyń quny ǵana emes, qosymsha jabdyqtar men qosalqy bólshekter úshin de ótemaqy tóleý kózdelgen. Al saqtandyrýshynyń pikirinshe, olardyń bir bóligi apat saldarynan zaqymdanbaǵandyqtan, naqty keltirilgen shyǵyn ǵana ótelýi tiis.
Budan bólek, saqtandyrý kelisimshartynda aviatsiialyq oqiǵanyń sebepteri men mán-jailary ótemaqy tóleý týraly sheshim qabyldaýda mańyzdy ról atqaratyny kórsetilgen. Sondai-aq keiinnen keltirilgen shyǵyndy kináli tulǵalardan óndirip alý máselesi de qarastyrylýy múmkin.
Qoǵamda suraq týǵyzǵan jaǵdai
Tergeý qorytyndysy boiynsha, Mi-8 tikushaǵy ekipaj áreketteriniń saldarynan apatqa ushyraǵan degen tujyrym jasalǵan. Osyǵan bailanysty ushqyshtarǵa Qylmystyq kodekstiń 344-baby boiynsha aiyp taǵylǵan.
Sonymen birge TJM saqtandyrý kompaniiasynan tek áýe kemesiniń qunyn ǵana emes, apattan zardap shekpegen bolýy múmkin jabdyqtar men qosalqy bólshekter úshin de ótemaqy talap etip otyrǵany qoǵamda túrli suraq týǵyzyp otyr. Ázirge ministrlik bul máselege qatysty resmi túsinikteme bergen joq. Is boiynsha túpkilikti qorytyndy sot sheshimi men TJM-niń jaýabynan keiin belgili bolmaq.
