Бүгін Батыс Қазақстан облысы, Орал қаласында «Таза Қазақстан» жалпыұлттық экологиялық акциясы аясында қала тұрғындары мен базар маңындағы шағын кәсіп иелеріне түсіндіру жұмыстары жүргізілді,- деп хабарлайды Dalanews.kz
Аталған іс-шараның мақсаты — қоғамда экологиялық мәдениетті қалыптастыру, қоршаған ортаны қорғауға үндеу және еріктілердің қатысуымен жасыл бастамаларды ілгерілету болды.
Акция аясында:
- 10-ға жуық ерікті жас бірігіп, белсенділік танытты;
- 100-ге жуық «Таза Қазақстан» тақырыбындағы ақпараттық брошюра таратылды;
- 150-ге жуық қала тұрғынына тұрмыстық тазалықты сақтау жөнінде түсіндіру жұмыстары жүргізілді;
- Базар аумағындағы 30 шағын кәсіп иесіне санитарлық талаптар мен тазалық нормалары түсіндірілді;
- Сонымен қатар, тұрғындар арнайы дайындалған «Біз – таза ел үшін!» тақтайшасымен естелік суретке түсті.
Шара барысында Батыс Қазақстан облысының жастармен жұмыс жөніндегі ресурстық орталығы басшысының орынбасары Нұрсұлтан Сарсенбаев акцияның маңыздылығына тоқталды.
«Акцияның негізгі мақсаты — қоғамды экологиялық мәдениетке тәрбиелеу, қоршаған ортаны таза ұстауға үндеу және еріктілерді тарту арқылы экологиялық бастамаларды ілгерілету. Апта сайын өңірімізде тазалық жұмыстары жүргізіліп келеді. Бүгінгі шарамыздың басты ерекшелігі — еріктілердің белсенділігі мен халықтың экологиялық сана-сезімге оң көзқараспен қарауын қалыптастыру», — деп атап өтті ол.
Ұйымдастырушылар бұл бастаманың жалғасын табатынын және Орал қаласының тұрғындарын алдағы шараларға белсенді түрде қатысуға шақырды.
