Ұлттық құрылтай мүшесі Бөріхан Нұрмұхамедов жаңа Конституция жобасына қатысты қоғамда қызу пікірталас жүріп жатқанын атап өтті. Оның айтуынша, сын айтушылардың басым бөлігі құжаттың нақты баптарын талдаудан гөрі, өзгерістерге алдын ала қалыптасқан күдікпен қарайды, деп хабарлайды Dalanews.kz.

Ол Конституцияны құқықтық ережелер жиынтығы ретінде емес, саяси белгі ретінде қабылдау үрдісі байқалатынын жеткізді. Соның салдарынан құжат мәтінін талқылаудан гөрі, оның артында қандай ниет болуы мүмкін деген жорамалдар басым түседі.

«Мемлекет нақты ережелер, өкілеттіктер және жауапкершілік арқылы жұмыс істейді. Сондықтан Конституцияны бағалағанда оның қандай жаңа құрылымдар енгізетінін, кім неге жауап беретінін және олардың арасында қандай тепе-теңдік бар екенін қарау керек», – деді ол.

Нұрмұхамедовтің пікірінше, кей жағдайда реформаның нақты нормаларына сүйенбей-ақ, оған жасырын мақсаттар телінеді. Алайда мұндай сын нақты құқықтық негізге емес, эмоция мен болжамға құрылатынын айтты.

Сонымен қатар ол кейбір сарапшылар алдымен жалпы саяси қорытынды жасап алып, кейін жекелеген баптарды соны дәлелдеуге пайдаланатынын сынға алды. Бұл тәсіл талдауды объективті бағалаудан алыстататынын атап өтті.

Ұлттық құрылтай мүшесі ең қатты сын айтып жүргендердің бір бөлігі Конституция жобасын әзірлеу жұмысына қатыспағанын және балама ұсыныстар ұсынбағанын да айтты. Оның сөзінше, конструктивті диалог үшін нақты ұсыныстар қажет.

Ол бұған дейін реформаларды қолдаған азаматтардың кейбірі нақты өзгерістер ұсынылған кезде күмән білдіре бастағанын атап өтті. Бұл жалпы өзгерісті қолдау мен нақты құжатты қабылдау екі түрлі мәселе екенін көрсетеді.

«Сын айту – қалыпты әрі қажет. Бірақ ол нақты баптарға сүйеніп, олардың салдарын түсіндірген жағдайда ғана пайдалы болады», – деді Нұрмұхамедов.

Оның пікірінше, қоғам эмоция мен болжамға емес, нақты мазмұнға негізделген талқылауға көшуі тиіс. Сонда ғана жаңа Конституцияның ел болашағына ықпалы дұрыс бағаланады.