Атырау мұнай өңдеу зауыты бензин экспорттауға квота алды, бірақ отын сыртқа шығарылмауы мүмкін, деп хабарлайды dalanews.kz.
Атырау мұнай өңдеу зауыты тамызда АИ-92 маркалы бензиннің 13,2 мың тоннасын экспорттауға квота алды. Осылайша, зауыттан сыртқа шығарылатын бензиннің жалпы көлемі 43,8 мың тоннаға жетті.
Квотаның 7,1 мың тоннасы "ҚазМұнайГазға", ал 6,1 мың тоннасы KC Energy Group компаниясына бөлінген. Бұған дейін "Конденсат" мұнай өңдеу зауытына да квота берілген. Оның көлемі АИ-92 бензині бойынша 27,6 мың тонна, АИ-95 бойынша 2,9 мың тонна болды.
Алайда Атырау мұнай өңдеу зауытынан бензинді экспорттау жоспары әзірге белгісіз. Себебі отынды сыртқа шығару бойынша келісімшарттар жасалмаған. Сонымен қатар, қыркүйек-қазан айларында Павлодар мұнай-химия зауытында жөндеу жұмыстары жүргізілетіндіктен, ішкі нарық үшін отын қорын алдын ала жинау қажет.
Шілдеде Павлодар мұнай-химия зауытынан да бензин экспортталмады. Трейдерлердің бірінің айтуынша, тараптар келісімге келе алмаған. Ал "Конденсат" зауытынан Ресейге шамамен 9 мың тонна бензин жеткізілген.
Дереккөздердің пікірінше, тамызда Атырау мұнай өңдеу зауытынан бензин экспорттау жоспары да жүзеге аспай қалуы мүмкін. Себебі маусымдық сұраныс жоғары кезде бензинді сыртқа шығару ішкі нарықта отын тапшылығына әкеп соғуы ықтимал.
