Жуырда әлеуметтік желіде Ту ұстап, тұмшаланып суретке түскен қыздардың суреті қызу талқыға түсті. Мәжіліс депутаты Ермұрат Бапи осы мәселеге орай Бас прокурор Берік Асыловқа депутаттық сауал жолдады, – деп хабарлайды Dalanews.kz.
Депутаттың сөзінше, интернет ресурстардан және қоғам ортасынан жиі байқалып жүргендей, ұлтымыздың қастерлі мұраларына, мыңдаған жылдық салт-дәстүрлерімізге шабуыл толастамай тұр.
Ермұрат Бапи былтырғы домбыраға қатысты шуды еске салды.
"Былтыр жат діни ағымның жетегінде кеткен біреулер «Домбыра – харам» деп, қазақтың ең құнды музыкалық аспабын іске алғысыз еткісі келсе, тағы бір елірген тобыр басына сәукеле киіп, көшпенді халықтық ғасырлар бойғы баспанасы киіз үй ішінде жартылай жалаңаштанып, жынойнақ бимен ұлттық қоғамның ашуын туғызған болатын", - деді ол.
Депутат Атыраудағы жайт та азаматтардың ашу-ызасын тудырғанын мәлімдеді.
"Ең сорақысы – мемлекетіміздің басты рәміздерінің бірі Көк туымызды қорлаушылар бой көрсетті. Жуырда ғана Атырауда болған оғаш оқиға қоғамда үлкен резонанс туғызып, азаматтардың ашу-ызасын тудырып отыр.
Бет-ауызын тұмшалап, қара жамылған төрт әйел мұз айдынында өткен спорттық жарыс кезінде Қазақстан Республикасының мемлекеттік Туын ұстап түскен сурет әлеуметтік желілерге кеңінен тарап кетті. Олардың қолындағы мемлекеттік Тудың бетіне араб жазуы мен араби қылыштың сұлба-суреті салынған", - деді Бапи.
Мәжіліс депутаты Ту арнайы жасалғанына назар аударды.
"Мұнда біздің назарымызды аударған – көк Тудағы араб қарпіндегі жазудың өте сапалы түрде, арнайы баспа құралымен таңбалануы. Демек бұл – жай ғана тұрмыстық бұзақылық, әдепсіз шектен шығушылық қана емес. Бұл – біздің қоғамымызға, мемлекеттігімізге, ұлттық дәстүріміз бен бірегейлігімізге жасалған ашық және нақақ қарсылық.
Ту – әрбір қазақстандық үшін қасиетті құндылық. Бұл мемлекеттің тәуелсіздігі мен тұтастығының қастерлі символ белгісі. Оны бөтен белгілермен, әлдебір жат мазмұндағы жазулармен бүлдіру – заңға өрескел қайшы және қылмыстық жауапкершілікке тартуды талап ететін әрекет", - деді ол.
Ермұрат Бапи мұның артында әлдебір күштер тұр деген пікір білдірді.
"Мемлекеттік туды қорлау – бүкіл халықты, тұтас мемлекетті қорлау! Сондықтан мұндай заң бұзушылық қатаң әрі мүлтіксіз жазалануы тиіс. Бірақ ескере кететін бір жәйт – елдің туын бүлдіру арқылы жат пиғылды дәріптемек болған бұл төрт қыз әлдебір арандатушы топтың құрбаны болуы мүмкін. Олар жастық алаңғасырлықпен, әлде материалдық қызығушылықпен немесе діни сауатсыздықпен жасаған бұл өрескел заң бұзушылықтың тасасында тұрған әлдебір кереғар күштер бар сияқты.
Міне, әкімшілік тұрғыдағы жазасын алған төрт қыздан бұрын, осы қылмысты әрекетті ұйымдастырушылар жазаға тартылуы тиіс. Қазақстан Қылмыстық кодексінің 372-бабында: "Қазақстан Республикасының мемлекеттік рәміздерін қорлау – үш мың айлық есептiк көрсеткiшке дейінгі мөлшерде айыппұл салуға не сол мөлшерде түзеу жұмыстарына не тоғыз жүз сағатқа дейінгі мерзімге қоғамдық жұмыстарға тартуға не екі жылға дейiнгi мерзiмге бас бостандығын шектеуге не сол мерзiмге бас бостандығынан айыруға жазаланатыны" көзделген", - деді ол.
Депутат осындай түр-түсі бұрмаланған Қазақстан туы Wildberries Russ маркетплейсінде 5000 мың теңгеден еркін және ашық саудада сатылып жатқанын сынады.
"Бұл не сұмдық?! Бұған кім жол беріп отыр? Сөз жоқ, ел Конституциясы бойынша, біз зайырлы мемлекетпіз, онда дін мемлекеттік саясаттан тыс деп жазылған. Қазақстан – әрбір азаматтың діни сенім бостандығы сақталған ел. Бірақ біздің ұлттық құндылықтарымыз, халық бірлігі мен мәдени мұрамыз заңмен қорғалады.
Дегенмен әлдебір теріс ағымдық іс-әрекеттер біздің ұйысқан бірлігімізге қол сұғатын болса, біз мұндай мәселені мемлекеттік саясаттан ажыратып қарай алмаймыз! Сондықтан қоғамда заңды түрде алаңдаушылық тудырған бұл бассыздыққа тиісті баға берілуі керек. Бұл – жеке біреулердің діни көзқарасын білдіруі емес, қоғам тұрақтылығын, мемлекеттік тұтастықты бұзуға бағытталған нақақтан-нақақ жасалған арандату. Бұны ежелден қалыптасқан діни бірлік пен қоғамға жарқышақ салудың қаскөй әрекеті деп бағалау керек!" - деп ашынды ол.
Ермұрат Бапидің пайымынша, бұл оқиғаның арандатушылық мазмұны мен мемлекеттік тудың бетінде қолданылған символиканың сипаты оның алдын ала жоспарланғанын, әлдебір топтың нақақ ұйымдастырғанын көрсетеді.
"Бұған кім тапсырыс берді? Ұйымдастырушылардың мақсаты қандай? Бұл сұрақтарға құқық қорғау органдары нақты жауап беруі тиіс! Мұндай арандатушылықтың қайталануына жол бермеу үшін тергеу-тексеру шарасы жан-жақты жүргізілуі қажет.
Жуырда өткен Ұлттық Құрылтайда Мемлекет басшысы Қасым-Жомарт Тоқаев ұлттық дәстүрлерімізді дәріптеуге шақырып, қазақы киім біздің ұлттық болмысымызды айқындап, халқымыздың қайталанбас келбетін көрсететінін ерекше атап өтті. Ал біз не көріп отырмыз? Осы ұлттық бірегейлікті дәріптеуге қарсылық білдіру белгісі ғана емес, бұл – қоғамға қарсы бағытталған ашық арандатушылық. Бұл – халқымызға жат нормаларды күштептаңу, тарихымызды, мәдениетімізді, ұлттық мақтанышымызды жоққа шығару әрекеті.
Бұл әрекеттің адам құқықтарын қорғау принциптеріне еш қатысы жоқ. Біздің ұлттық салт-дәстүріміз бен мыңжылдық мұра-мұратымызға, халықтық қадір-қасиетімізге қайшы келетін мұндай азаматтық құқық бізге қажет емес! Бұл – қоғамды екіге жарып, әлеуметтік жік тудыруға, дінді – мемлекетке, ұлттық дәстүрді – жасанды радикалды нормаларға қарсы қоюға бағытталған нақақ және қаскөй әрекет. Сондықтан біз мұндай қауіптерге көз жұмып қарай алмаймыз!" - деді ол.
Мәжіліс депутаты жауапты мекемелерден мына шараларды шұғыл қолға алуды ұсынды:
- Қолданыстағы заңнамаға сәйкес құқық қорғау органдары бұл жағдайды жіті тексеріп, арандатушылыққа алданған төрт әйелдің артында тұрған күштерді, жалған туды дайындаушыларды, оны таратушыларды анықтап, мұндай қастандықтың жолын кесу үшін ұйымдастырушыларға қатаң жаза қолдануы тиіс!
- Бекітілген стандартқа сәйкес келмейтін, ресми сипаты бұрмаланған мемлекеттік рәмізді сатуға шығарған сауда орындарының басшылығын жауапқа тарту керек. Сатылып кеткен туларды жинап алып, жою қажет!Сондай-ақ, тиісті заңнамаға мемлекеттілігімізді мансұқтайтын, қоғамды жікке бөлуді көздейтін тауарлар сатқан жекелеген маркетплейстерге қарсы санкция салуды көздейтін түзетулер әзірлеп, оны заң нормасына енгізу керек.
- Мемлекет радикалды ағымдардың өрескел әрекеттеріне бақылауды күшейтіп, діни құндылықтарды бұрмалауға қарсы шараларды қатаңдату қажет. Ұлттық бірегейлікті қорғаудың жүйелі және жалпыға ортақ саясатын қалыптастыратын уақыт жетті!
- Зайырлы білім беру жүйесін нығайтуды, орта мектептердегі дінтану сабақтарын ұлттық мұралар негізінде жүргізу бағдарламасы дайындалуы керек!
Желіде дау тудырған сурет не туралы?
Суреттегілер Сауд Арабиясы туының элементтері бар Қазақстан Туын ұстап тұрғаны көрінеді. Оның жоғарғы бөлігінде арабша жазу мен қылыш бейнеленген.
Кейінірек оларға сот шешімі шықты:
- Н.-ға 15 тәулікке әкімшілік қамаққа алу түріндегі әкімшілік жаза қолданылды.
- А.-ға әкімшілік жаза ретінде 78 640 теңге әкімшілік айыппұл салынды.
- Кәмелетке толмаған Х.-ның заңды өкіліне әкімшілік жаза ретінде 39 320 теңге әкімшілік айыппұл салынды.
- Кәмелетке толмаған А.-ның заңды өкіліне әкімшілік жаза ретінде 39 320 теңге әкімшілік айыппұл салынды.
