Атыраудағы балабақшалардың бірінде мекеме қызметкері ерекше балаға қол көтерген. Аталмыш оқиғаның видеосы әлеуметтік желіде тарап кетті, деп хабарлайды Dalanews.kz.
Даму мүмкіндігі шектеулі балаларды тәрбиелейтін "Дара-Инклу" жекеменшік балабақшасында жайсыз жайттың беті ашылды.
Видеода тәрбиеші бүлдіршінге екі алақанын көрсетіп, “10 бер” дейді. Бірақ бала тек бір алақанын көтерген сәтте тәрбиеші “Қарасайшы, қарағым-ау!” деп оның басынан ұрып жібереді.
Бұл оқиғадан кейін баланың ата-анасы қызметкердің үстінен арыз жазған. Осыған байланысты құзырлы органдар тергеп-тексеру амалдарын жүргізіп жатыр.
“Қалалық білім бөлімінің жанынан да қызметтік тексеріс ашылатын болады. Атырау қалалық полиция департаменті аталған факті бойынша анықтау жұмыстарын жүргізіп жатыр. Оқиға бөлім басшысының қатаң бақылауында”, - делінген хабарламада
Сонымен қатар тексеру қорытындысымен оқиғаға қатысты заң шеңберінде тәртіптік шара қарастырылатыны да айтылған.
