Алматыда Төле би және Қазыбек би көшелерінің кей бөліктері уақытша жабылады, деп хабарлайды dalanews.kz.
Қала күніне орай өтетін мерекелік іс-шараларға байланысты Төле би және Қазыбек би көшелерінің Абылай хан даңғылынан Назарбаев даңғылына дейінгі бөліктерінде көлік қозғалысы уақытша шектеледі.
Шектеу 17 қыркүйек сағат 15:00-ден 21 қыркүйек сағат 03:00-ге дейін күшінде болады.
Бұдан бөлек, 17 қыркүйек сағат 22:00-ден 21 қыркүйек сағат 24:00-ге дейін Төле би көшесінің Назарбаев даңғылынан Абылай хан даңғылына дейінгі бөлігі толығымен жабылады. Осыған байланысты №16, 37, 48, 126, 201, 205, 206, 209, 210 және 224 автобус бағыттарының қозғалыс сызбасы уақытша өзгереді.
№37, 48, 201, 206, 209, 210 және 224-автобустар шығыс бағытта Абылай хан даңғылы, Қабанбай батыр көшесі және Назарбаев даңғылы арқылы, ал батыс бағытта Назарбаев даңғылы, Бөгенбай батыр көшесі және Абылай хан даңғылы арқылы жүреді.
Ал №16, 126 және 205-бағыттар жабылған учаскені айналып өтіп, Гоголь, Қалдаяқов, Желтоқсан, Наурызбай батыр көшелері және оларға іргелес жолдармен қатынайды.
