Қаржы мониторингі агенттігі төрағасының орынбасары Қайрат Бижанов мемлекеттік сатып алудағы негізсіз баға өсімі туралы айтты, деп хабарлайды Dalanews.kz.

Үкімет отырысында Бижанов шағын мемлекеттік сатып алу кезінде (100 АЕК-ке дейін, яғни 2025 жылы 393 200 теңгеге дейін) келісімшарттағы баға мен нақты құн арасында үлкен айырмашылықтар бар екенін мәлімдеді. Оның айтуынша, қарапайым орауыш скотчтың бір данасы кей келісімшарттарда 2 мың теңгеден 99 мың теңгеге дейін көрсетілген.

Агенттік келесі заңбұзушылықтарды анықтады:

• 7,5 мың жағдайда келісімшарт жасалғаннан кейін баға ұсыныстары жүйеден өшірілген;

• 8 мың келісімшарт (жалпы сомасы 8,3 млрд теңге) бойынша іріктеп жүргізілген талдау бағаның 4 млрд теңгеге жуық негізсіз көтерілгенін көрсетті;

• Техникалық талаптарға сай келмейтін тауарлар жеткізу фактілері тіркелген.

Мұндай сатып алулар Omarket.kz платформасы арқылы жүргізіледі. Жүйе ең төмен бағаны автоматты түрде таңдауы тиіс. Алайда Бижановтың айтуынша, іс жүзінде орташа бағаны жасанды көтеру схемалары жиі кездеседі.

Агенттік мемлекеттік сатып алу рәсімдерін бақылау мен реттеуді күшейтетінін мәлімдеді.
Мақсат - бюджет қаржысының ашық әрі тиімді жұмсалуын қамтамасыз ету.