Қазақстанда шамадан тыс жүк тиеген ауыр көліктердің жол инфрақұрылымына келтіретін зияны күшейіп отыр, деп хабарлайды dalanews.kz.
«ҚазАвтоЖол» мәліметінше, 2026 жылдың алғашқы сегіз айында автоматтандырылған өлшеу станциялары көліктердің рұқсат етілген салмақ нормасын бұзуы мүмкін деген 870 мыңға жуық жағдайды тіркеген.
Олардың ішінде 139 мың көліктің салмағы 50 тоннадан, 12 мыңының салмағы 100 тоннадан асқан. Ал шамамен 1 мың жүк көлігінің салмағы 200 тоннадан жоғары болған.
Автомобиль жолдары белгілі бір жүктемеге есептеліп салынады. Жүйелі түрде шамадан тыс жүк тасымалдау жаңа төселген асфальттың өзін тез бүлдіріп, жолда терең ойықтардың, қауіпті ығысулар мен деформациялардың пайда болуына әкеледі. Соның салдарынан мемлекет миллиардтаған теңге жұмсап салған және қайта жаңғыртқан жолдар жоспарланған жөндеу мерзіміне жетпей жарамсыз болып қалуы мүмкін.
«ҚазАвтоЖол» мәліметінше, кейбір тасымалдаушылар айыппұлдан жалтару үшін бақылау жүйелерін айналып өтуге тырысады. Жүк көліктерінің жүргізушілері автоматты өлшеу бекеттерін жол жиегімен және техникалық өткелдер арқылы айналып өтеді. Кей учаскелерде заң бұзушылар қорғаныс қоршауларын өз бетінше алып тастаған.
Жыл басынан бері автоматтандырылған өлшеу жүйелерінің үш нысанын өртеу фактісі тіркелген. Бұл әрекеттердің мән-жайын құқық қорғау органдары анықтап жатыр.
Ұлттық компания өкілдері бақылаудың күшеюі жүк тасымалдаушыларға қарсы бағытталмағанын атап өтті. Жүк көлігі экономика, құрылыс және сауда үшін маңызды болғанымен, бір рейсте көбірек жүк тасымалдау арқылы шығынды азайтуға тырысу ортақ жол инфрақұрылымының бұзылуына алып келеді.
