Батыс Қазақстан облысында алимент төлеуден жалтарған борышкер 6 айға бас бостандығынан айырылды, деп хабарлайды dalanews.kz.
БҚО кәмелетке толмағандар істері жөніндегі мамандандырылған ауданаралық сотының 5 мамырдағы үкімімен ер адам Қазақстан Республикасы Қылмыстық кодексінің 139-бабы бойынша кінәлі деп танылған.
Сот барысында оның бір жылдан астам уақыт бойы кәмелетке толмаған баласын асырау жөніндегі сот шешімін орындамағаны анықталған. Соның салдарынан алимент бойынша қарызы 4 миллион теңгеге жеткен.
Прокуратура мәліметінше, бұған дейін де ол осындай құқықбұзушылық үшін қылмыстық жауапкершілікке тартылған. Алайда рақымшылық жасау туралы актінің қолданылуына байланысты жазадан босатылған. Соған қарамастан ата-аналық міндеттерін орындаудан жалтаруын жалғастырған.
Сот үкімі әзірге заңды күшіне енген жоқ.
Ведомствоның дерегінше, биылғы жылдың алғашқы төрт айында Батыс Қазақстан облысында алимент төлеуден жалтару фактілері бойынша Қылмыстық кодекстің 139-бабымен 21 қылмыстық құқықбұзушылық тіркелген. Оның ішінде 7 іс тараптардың татуласуына байланысты тоқтатылса, 5 іс бойынша айыптау үкімдері шығарылған. Қалған істер өндірісте жатыр.
Прокуратура сот шешімдерін орындамау қылмыстық жауапкершілікке әкелетінін еске салды.
